Aningaasanut inatsit paragraffi atorneqajuitsoq malillugu annaanneqarpoq
Tamassuma iluatsinniarnerani Inatsisartut siulittaasuata, Lars Emil Johansenip pisinnaatitaaffini atorlugu, Naalakkersuisut allannguutissatut siunnersuutaat akuersissutigaa, tamannalu Inatsisartut siulittaasoqarfiata ilaasortaannut allakkatigut akuerisassanngorpaa, aningaasanut inatsit Inatsisartuni oqaluuserineqarnissaa tiimialunnguit sioqquqqullugu.
Taama kingusitsigisumik allannguutissanik oqaluuserisassanngortitsisoqarnera, Inatsisartut suleriaasiisa malittarisassaanik unioqqutitsisoqartoq, Inatsisartuni illuatungiliuttut, Inuit Ataqatigiit isumaqarput.
- Sianerfigineqarpugut atsiugassaqarattagooq kisianni atsiunngilagut ungut taama aalajangiinermut peqataannginnerput pissutigalugu.
Inatsisartut siulittaasoqarfiani ilaasortaq, Ane Hansen, Inuit Ataqatigiit taama oqarpoq.
Allannguutissatut siunnersuutit kingusinnerpaamik ulloq ataaseq sioqqullugu, Inatsisartunut ilaasortanut nassiussuunneqareersimasussaasoq, Inatsisartut sileriaasinanni, paragraf 34-imi allassimavoq. Tassalu tamanna unioqqutinneqartoq Inatsisartuni illuatungiliuttut isumaqarput oqarlutik tamanna inatsisinik unioqqutitsinerusoq.
Piffissaliussamik eqquutsitsisinnaanngikkaanni, tamanna Inatsisartut suleriaasianni aamma malittarisassaqarpoq, tassalu Inatisartut sulieriaasianni paragraf 41 malillugu periarfissaqarluni, piffissaq kingullerpaaq atorlugu allannguutissanik oqaluuserisassanngortitsinissamut.
Tamanna pillugu Inatsisartut siulittaasuat, Lars Emil Johansen ima nassuiaavoq.
- Suleriaatsitsinni paragraf 41 najoqqutaralugu pissutsit immikkut itsillugit Siulittaasoqarfik akuersisinnaavoq, piffissarititaasut atornagit siunnersuutit suliarineqarsinnaanngippata. Tamannalu pimmat, Siulittaasoqarfik paasiniaavigaara, ulloqeqqanngitsiartoq, qinnuvigalugit piaartumik akissuteqaqqullugit. Taava nalunaaqutaq ataatsimut, Inatsisartut ataatsimiinnissaat sioqqullugu tamanna piareersimasussaammat, amerlanerillu akereermata, oqarpunga tassa tamanna aalajangernerusoq. Lars Emil Johansen nassuiaavoq.
Taamaakkaluartoq Inatsisartuni illuatungiliuttut, Inuit Ataqatigiit tamassumunnga isumaqataasinnaanatik nalunaarutigaat.
- Ataatsimiinnerup aallartinnissaanut piffissaliussaq taama sivikitsigimmat, tamanna illersorneqarsinnaanngitsutut isigigatsigu atsioqataanissatsinnut naaggaarnerput nalunaarutigaarput, Ane Hansen oqarpoq.
Inatsisartulli siulittaasuat allatut isumaqarpoq.
- Isumaqarpunga pissutsit immikkut ittuusut, aningaasanut inatsit, novembarip 15-niat naatinnagu naammassineqartussap suliarineqarnerani allannguutissaqartoqalernera. Ullup taassuma ingerlanerani allannguutissatut siunnersuutigineqartut assortuussutaaneri partiilersuussinerupput, tamannalu tulluanngilaq, tassami Inatsisartut suleriaasiat naapertorlugu tamanna aalajangernerummat. Inatisartut siulittaasuat, Lars Emil Johansen taama oqarpoq.
