Aningaasanut inatsisissatut siunnersuut Inatsisartuni ullumi pingajussaaneerneqassaaq

Aningaasanut inatsit aappaagumoortoq, Inatsisartut ullumi nalunaaqutaq ataatsimut pingajussaanneerlugu oqallisigissavaat. Aningaasanut inatsisissap Inatsisartuni amerlanerussuteqartunit isumaqataaffigineqarnissaa ilimanarluinnarpoq.
Allattoq Apollo Jeremiassen
novembarip 15-at 2013 06:25

Misileraalluni aalisarnerup akitsuuserneqarneratigut Nunatta karsiata amigartoorutissaasa ilaasa matussuserneqarnissaanik, Aningaasanut Akileraartarnermullu ataatsimiititaliap siulittaasuata ilungersuutigereerlugu akuersissutigineqarnissaa innersuussutigaa, naak Inuit Ataqatigiit tamatumunnga isumaqataanngikkaluartut.

Avaleraasartuunik misileraalluni aalisarnermit 90 millionit koruunit aappaagu isertinneqarsinnaanngussapput taamaalilluni aappaagu amigartoorut mumillugu 24 millionit koruuninik sinneqartoornermik kinguneqassalluni.

Nunatta karsiata amigartooruteqarluni ingerlanneqarnissaanik assortuussutaasup kinguneranik, aningaasanut inatsisissap oqaluuserineqarnissaa arlaleriarlugu kinguartinneqartarpoq.

Inatsisit naapertorlugit, Aningaasanut inatsisissap akuerineqarnissaanut ullumi ulloq kingulliuvoq.

Aningaasanut inatsimmut Inuit Ataqatigiit isumaqataaniannginnertik nalunaarutigereerpaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq