Aningaasanut inatsisissaq saqqummiunneqalersoq

Siunnersuullu sunik imaqarnissaanik naatsorsuutigisinnaasagut oqaluttuaritilaarusullugit nutaarsiassani aaqqissuisoq Jens Thorin maanna aallakaatitsivimmeeqatigaara.

Jens. Siullermik nunatta karsianut missingersuutit 7 milliardit missarluinnaaniittarput. Ataatsimut isigigaanni - sumunukua atorneqartartut.

- Aningaasat pingaarnermik suliassaqarfinnut nunatta tigoriigaanut atorneqartarput, soorlu ilinniartitaanermut, peqqinnissaqarfimmut isumaginninnermullu. Taakkua pingasuullutik aningaasat pingajorarterutaat marluk atortarpaat. Taava aamma Namminersorlutik Oqartussani allaffissorneq, aatsitassarsiorneq, anngallannermi kiffartuussinissamut isumaqatigiissutit allarpassuillu aningaasalersugassaapput.

Aningasammi suminngaanneerpat ?

- 4 milliardit koruunit missarluinnaat Danmarkimiit EU-miillu pissarsiarisarpavut, sinneri akileraarutitigut akitsuutitigullu isertarput

Upernaaq naalakkersuisoqatigiilersut aningaasanut inatsisissatut siunnersuutaanni una siulliuvoq. Suut nakkutiginiassavagut?

- Immikkoortut qitiusut akisussaqisullu ilagaat, Naalakkersusisoqatigiit 2019-innguinnartorli suliffeqarnermi ilanngaateqalersitserusukkamik.

Tassalu Naalakkersuisoqatigiit, Siumut, Partii Naleraq, Nunatta Qitornai aamma Atassut ilanngaammik taamaattumik atuutilersitsinissamut aningaasanik nassaarsimanersut pissanganarpoq.

Akileraarutit isertitakinnerpaat malugisinnaasaannik appartinneqassappata, tamanna 300 millionit koruunit tungaannut akeqassasoq, siusinnerusukkut naatsorsuinerit takutippaat.

Mittarfissarsuit maanna oqallissutigineqarluartunut ilaapput. Takkua aningaasanut inatsisissamut sunniuteqassappat?

- Aap, tamanna ilamanarluinnarpoq. Imaalilluni, Inatsisartut Qaqortumi, Ilulissani Nuummilu mittarfissanut siorna aningasaleerujussuarnissamut akuersimmata.

Inatsisartut Naalakkersuisut Kalaallit Airportsimut 2,1 milliardit koruuninik aningaasaliinissaannut pisinnaatippaat,, aningaasallu taakkua politikkerit allanut atorsinnaanngilaat.