Aningaasanut inatsisissaq pingaarnertut sammiumaarpaat

Inatsisartut tallimanngornermi septembarip ulluisa 15-ianni ataatsimiilissapput, sapaatit akunnerini pingasuni ataatsimiittussaagamik.

Pisarneq malillugu Hans Egede-p illuani ullaakkorsiortoqaqqaarumaarpoq, kinguninngualu Annaassisitta Oqaluffiani naalagiartoqassaaq.

Naalagiartoqareerpat nalunaaqutaq aqqanernut inatsisartut siulittaasuata Jonathan Motzfeldtip ataatsimiinneq ammassavaa.

Siunnersuutit apeqquteqaatillu katillugit 137-t inatsisartut ulluni 25-ni ataatsimiinnerminni sammissavaat.

Naalakkersuisut 24-nik siunnersuuteqarput, siunnersuutillu sisamat inatsisartut upernaaq ataatsimiinnerminni sammisimasaat nangillugit sammineqassapput.

Inatsisartuni ilaasortat 90-inik siunnersuuteqarlutillu naalakkersuisunut apeqquteqaateqarput, siunnersuutillu sammineqartussat sinneri ilaasortat siornatigut siunnersuutigisimasarivaat, imaluunniit Nunat Avannarliit Killiit Siunnersuisoqatigiivineersuullutik.

Sammineqartussani pingaarnersiuissagaanni naalakkersuisut aappaagumut aningaasanut inatsissamut siunnersuutaat taaneqarsinnaavoq.

Aningaasanut inatsisissaq ajornaquteqanngitsumik akuersissutigineqarnissaa arlalinnit ilimagineqarpoq.

Inatsisartut pilersaarutit malillugit ataatsimiissappata, novembarip qeqqata missaata tungaanut ataatsimiissapput.