Aningaasanoornermik nappaateqartut inatsisartuni

Lottonik pisinerni akitsuutit aningaasanoorutinullu akitsuutit qaffannerisigut aningaasanoornermik nappaateqarneq akiorniarneqarsinaanngilaq. Inatsisartut ullumi ataatsimiinneranni aningaasanoornermik nappaateqarnerup akiorneqarniarnissaanik pinaveersaartinniarneqarnissaanillu siunnersuuteqartoqarpoq marlunnik. Demokraatit inatsisartuni ilaasortaatitaat Lene Knuppel siunnersuuteqarnermini akitsuutip qaffanneqarnissaanik siunnersuuteqarpoq, taakkunannga 2,5 millioner koruunit ukiumut, aningaasanoornermik nappaateqartut katsorsarneqarnissaannut atugassanngortinneqassasut. Partiit sinnerisa , Aningaasaqarnermut Nunanullu allanut naalakkersuisoq isumaqatigaat, tassalu aningaasat pisariaqartinneqartut peqqinnissamut aningaasaliissutigineqartunit tiguneqassasut.

Atassutip siunnersuutigisaa tapersersorneqarneruvoq tassalu, aningaasanoornerup nappaatigineqarnerata pinaveersaartinniarneqarneranut aningaasanut inatsimmit, aningasat tiguneqassasut.

Paarisap misissuisitsinerani paasineqarpoq, nunatsinni innuttaasut 2 procentii aningaasanoornermik nappaateqartut, tassalu inuit 6- 700-inik amerlassuseqarput.

Siunnersuutigineqartut marluk peqqinnisamut ataatsimiiititaliamut suliassanngortinneqarpoq.