Aningaasaliisut isumannaassuseq piumasaraat
Karsten Dybvadip statsministeriaqarfimmi pisortaanertut atorfeqarnermini Kalaallit Nunaat suliassaqarfigalugu, kingornalu aamma Kalaallit Nunaanni Sulisitsisut Peqatigiiffianik suleqateqarnermini Nunarput ukiuni arlalinni qanimut malittarisimavaa.
-Uanga aalajangigassarinngilakka, Kalaallit Nunaata nammineerluni aalajangiiffigisussaavaa, Danmarkimili iliortarnitsitut aamma GA iliortarpoq, tassalu naalakkersuisunut oqariartuuteqartarluni. Suliffeqarfiit maani nunami milliarderpassuarnik aningaasaliisussat akileraartarnermut inatsimmut tunngatillugu isumannaatsumik inissisimasoqarnissaa pingaartittupilussuuaat, soorlu Inatsisartuni amerlanerussuteqalernikkut imaasiallaannik allanngortinneqarani. Siumut takorluuisinnaassuseqarnissaq suliffeqarfiit pingaartittupilussuuaat, Karsten Dybvad knr.gl-imut oqarpoq.
Aningaasaliinerit, suliniutinik angisuunik aallartisaanissamut pisariaqartinneqartut, ima annertutigaat, allaat Danmarkimi Kalaallit Nunaannilu taama annertutigisumik aningaasaliisinnaassuseqartunik suliffeqarfinnik peqarani. Aningaasaliisut aningaasaateqarluartut pisariaqartinneqarput, taakkulu sapinngisamik pitsaasunik atugassaqartinneqartariaqarput.
-Kalaallit, aammalu danskit suliffeqarfiutaasa periarfissaqarfigisaat tassaapput suliniutini angisuuni suliffeqarfissuanut pilersuisuunissaq. Taamaaliornikkut allat peqatigalugit ilisimasanik nutaanik pissarsisoqarsinnaavoq. Inuiaqatigiinni pikkorinnerulernissaq pingaaruteqartupilussuuvoq, taamaaliornikkummi Kalaallit Nunaanni aningaasaqarneq pitsaanerusoq atugarissaanerunerlu anguneqarsinnaapput, Karsten Dybvad, Dansk Industrimi pisortaaneq oqarpoq.
