Aningaasaliissutinik unitsitsineq MIPI-mit ugguarineqarpoq

Qallunaat Nunaanni højskolernissamut aningaasaliissutinik unitsitsineq inuusuttunut eqquissasoq, MIPI-mit oqaatigineqarpoq.

- Danmarkimi højskolertarnerit MIPI-mit immikkut ilisimasaqarfigineqanngillat, kisianni inuusuttut højskolernikuusimasut oqaatigisarpaat oqaatsit tungaatigut ilikkagaqartorujussuusarlutik ilinniaqqinnissamut periarfissagissaarnerulertarlutik, tassami sunaluunniit ilinniaqqiffissaq qallunaatut ingerlanneqartarami. Aammattaaq inuttut ineriartornerannut iluaqutaasartoq paasinarpoq, immikkortortaqarfimmi ataqatigiissaarisoq Lona Lynge oqarpoq.

Inuusuttut ilinniaqqinnissaminnut oqaatsinik pikkorissartarnertik iluaqutigisaraluaraat, Johan Meyer Sisimiuni oqaatsinik ilinniarfiup pisortaa oqarpoq.

- Qinnuteqartartut amerlanersaat meeqqat atuarfianniit aneqqammertuusarput, imaluunniit oqaatsitigut piginnaasakinnertik pissutigalugu ilinniakkaminnik maannaannaq unitsitsisimasartuusarlutik, Johan Meyer oqarpoq.

Aammattaaq inuusuttut soqutigisaat immikkuullarissut naapertorlugit neqeroorutigineqartartut Danmarkimisuulli amerlatiginnginnerat Johan Meyerip oqaatigaa.

Nunatsinni højskolerniarlutik qinnuteqartut 396-it siorna itigartinneqarput.

Inuusuttut kommuneni tamaneersut ukiut tamaasa qallunaat nunaanni højskolerniartut 400-it missaat qinnuteqartarput, taakkunanilu taamaallaat 40 aningaasaliiffigineqartarlutik.

Højskolerneq minnerpaamik inummut ataatsimut 60.000 koruuninik naleqarpoq, saniatigullu kaasarfimmiussat angalanermilu aningaasartuutissat inuusuttut namminneq akilertarlugit.