Aningaasaliissutikinnerugaluartoq pitsaassuseq qaffasippoq
Taama oqarpoq Tivolimi julip 30-aniit aggustip aallaqqaataata tungaanut pisussanik aaqqissuusseqataasoq, Søren Thalund, Kalaallit Illuanni Københavnimiittumi piorsarsimassutsimik paasissutissiinermillu suliaqartoq.
Aaqqissuisut ukioq manna 520.000 koruunit missaannik aningaasaliiffigineqarput, siornamut naleqqiullugit 300.000 koruunit missaannik ikinnerusunik. Søren Thalund ima oqarpoq:
- Tamanna kinguneqarsimavoq nipilersortartunik allanillu Kalaallit Nunaanneersunik amerlanngitsunik tikisitsisariaqalernikuugatta. Tassami akisoorujussuuvoq angalasussat aqqutissaat ullullu pingasut Københavnimi najuqarnissaat akilissagutsigu, nipilersortussallu aamma aningaasarsisussaassallutik, taamaakkaluartoq pitsaassuseq pitsaanerpaaffissaaniippoq, tamanna qularnaatsumik oqaatigisinnaavara, Søren Thalund oqarpoq.
Nipilersortartut, ilaatigut nunarsuarmi sumiiffinni assigiinngitsuni tusarnaartitsisarsimasut, pitsaassutsip qaffasissup angunissaanut qulakkeerinnittuussasut, Søren Thalundip naatsorsuutigaa.
Nipilersortartut Danmarkimiittut imaluunniit Europami tusarnaartitsiartorlutik angalasut annerusumik attartussavavut. Assersuutigalugu Nanook Københavnimi immiussisarfimmiipput, Nivi Nielsen aamma Simon Lynge tusarnaartitsillutik angalapput aammalu Bachhus Breed, erinarsortoralugu Malu Fleischer, maannakkut Danmarkimi najugaqarput. Taamaattumik nipilersortartut maaniittut ukioq manna attartussavagut.
Nivi Nielsen ammaasuussaaq aammalu Bachhus Breed, Juno, Simon Lynge allallu nutaat Eat My Muffin nipilersussapput kiisalu Nanook aggustip aallaaqqaataanni naggataartitsissallutik. Nipilersortartut taasakka tamarmik pitsaalluinnartuupput, Søren Thalund oqarpoq.
