GME: Aningaasaliisoq kiinamiu pisinissaminut periarfissinneqanngilaq

Tamanna ingerlatseqartigiiffiit marluk isumaqatigiinngissutigaat. Taamaattumillu isumaqatigiissuteqartoqarsimanngitsoq, pisortap KNR-imut oqaatigaa.

Kuannersuarni suliniummik ingerlatsisup Australiamiut ingerlatseqatigiiffiutaata Greenland Minerals and Energyp suliniutaata 12,5 procentianik pisisimalluni Kinamiut ingerlatseqatigiiffiutaat Shenghe tusagassiuutinut sapaatip akunnerata siuliani nalunaarpoq.

Kinamiut tusagassiuutinut nalunaarutaat naapertorlugu, Greenland Minerals and Energyp uranisiornera iluatsissappat GME-p piginneqataassutaata 60 procentiinik Shenghep pisiortornissaa periarfissaavoq. Kinamiut tusagassiuutinut nalunaarutaanni Politikenimit nutserneqartumi tamanna atuarneqarsinnaavoq.

- Suliffeqarfiit akornanni illugiilluni isumaqatigiinneq naapertorlugu Shenge Resources periarfissinneqarpoq piginneqataassut 60 procent tikillugu pisiarisinnaagaa, Politikenimi allassimavoq.

Kinamiulli suliffeqarfiutaata Shengep suliffeqarfimmut pissaaneqarnerulernissaanut periarfissiisinnaasumik isumaqatigiissut ilaqanngitsoq, Greenland Minerals and Energyp pisortaa KNR-imut allappoq.

- Shenghe periarfissaqanngilaq ilaannaanulluunniit pisussaanermik peqarani, GME-mi pisortaq, John Mair e-mailikkut KNR-imut allappoq.

Aamma atuaruk Evaldsen: GME pillugu nalunaarut misissorneqalerpoq

Tusagassiutinulli nalunaarummi sooq tamanna allassimava? Isumaqatigiissutip nutsernerlunneqarneranik tamanna tunngaveqartoq, John Mair allappoq. Suliallu ingerlanerani GME-mut Kuannersuarnilu suliniummut piginneqataassutinik annerusunik pisisinnaanissamut kinamiut soqutiginnissinnaanertik nalunaarutigigaat, pisortaq isumaqarpoq.  

- Shenghep takutiinnarpaa siunissamut suliaqarnissamut pilersaarutini pisussanilu suliamut toqqaannartumik 60 procent tikillugu minnerusumilluunniit piginneqaassuseqarnissaminik soqutiginnilluni. Periarfissaqanngillat ilaannaanulluunniit taama aningaasaliisuunissamut pisussaaffeqaratik, australiamiut suliffeqarfiutaanni GME-mi pisortaq John Mair allappoq.

Assigiinngitsunik nalunaaruteqarnerit paatsuunganartillugit aatsitassanut naalakkersuisoq suliamik sukumiinerusumik misissuilerpoq.

Toqqaannanngitsumik ilumut tunniussisoqarniarnersoq maanna paasiuminaappoq. Taamaaliortoqarniarnersoq maanna oqaatigineqarsinnaanngilaq. Aatsitassanut naalakkersuisoqarfiup tamanna misissussavaa, Randi Vestergaard Evaldsen Politikenimut oqarpoq.

Aamma atuaruk Vittus: Ernumanissaq aarlerisaaruteqarnissarluunniit kissaatinginngilara