Aningaasaliisoq aningaasanik aqutseqataassaaq
Kalaallit Nunaanni Assammik Arsartartut Kattuffiat GHF timersortartut kattuffiisut ajornartorsiuteqarpoq. Tassa sulineq nammineq piumassuseq tunngavigalugu ingerlavoq ilaatigullu naatsorsuutit nakkutiginerat kinguaattoorsinnaasarpoq. Maannali BankNordikimut isumaqatigiissusiornikkut tamanna iluarsiiviginiarneqarpoq.
Isumaqatigiissusiortut isumaqatigiissutip aningaasanngorlugu naliga oqaatigiumanngilaat. Taamaattoq oqaatigisinnaanerarpaat isumaqatigiissut ukiuni pingasuni atuuttussaasoq.
- Kisitsisinik saqqummiussaqarusunngilagut. Kisianni oqaatigisinnaavarput isumaqatigiissutigineqarmat sullissinissami nalunaaquttap akunnerinik atuiffiginiarivut. Tassani aningaasat isertitat aningaasallu atukkat nalunaarsornerat ingerlassinnaavarput, BankNordikip pisortaa Bjartur Nolsøe isumaqatigiissutip atsiornerani oqarpoq.
GHF nammineq piumassutsimik sulisunit ingerlanneqarpoq. Taamaammat naammagisimaarneqarpoq aningaasaliiffigineqarnissamik isumaqatigiissumi allaffissornikkut kiffartuunneqarnissaq ilanngunneqarmat.
- Nunatsinni timersortartut kattuffii allat assigalugit inissisimavugut. Sulineq nammineq piumassuseq tunngavigalugu ingerlavoq suliassallu tamaasa angumeriniarnerat ajornakusoorsinnaasarpoq, GHF-mi siulittaasup tullia Boas Møller oqarpoq.
Aningaasaliiffigineqarnissamik isumaqatigiissut atsiorneqarpoq nunatsinni pissartanngorniunnerit Ilulissani aallartinnissaannut sapaatip akunnerujunnaartoq. Isumaqatigiissut tunngavigalugu inersimasut pissartanngorniunnerat BankNordik GM-imik taagorneqalerpoq.
- Isumaqatigiissut assut naammagisimaarparput. Assammik arsarneq assut nuannarisaavoq aammalu Kalaallit Nunaanni tusagassiutini saqqumilaartinneqarluarluni. Qularutiginngilarput isumaqatigiissut aamma uatsinnut iluaqutaajumaartoq, Bjartur Nolsøe oqarpoq.
BankNordik GM Ilulissani aallartissaq ataasinngorneq apriilip 16-at tassani angutini SAK aamma Nagdlúnguak unammissapput.
BankNordik GM-imi KNR malinnaassaaq toqqaannartumik tv-kkut aallakaatitsisarnikkkut aammalu angusat KNRip nittartagaatigut ullut tamaasa nutartertarnerisigut.
