Aningaasaateqarfiup VILLUM FONDEN nunatsinnut aningaasarpassuarnik tunniusseqqittoq
Danmarkimi Røde Korsit inuusuttaat qanittukkut Kunngissap nuliatalu aningaasaateqarfianniit ilaatigut akissarsiaat atorlugit nunatsinni inuusuttuaqqat atugarliortunut Kalaallit Røde Korsiannik ikiuunniarput, inuusuttullu namminneq kajumissutsiminnik suliniuteqartalernissaat kaammattuutigineqarniarluni. Taamaammat Kalaallit Røde Korsiat Danmarkimilu Røde Korsit inuusuttaasa suleqatigiinnissartik qilanaareqaat:
- Kalaallit Nunaanni inuusuttut akornanni pisariaqartinneqaqisumi ataavartumillu namminneq kajumissutsiminnik sullisserusuttoqartalernissaanut suliniummut Danmarkimi Røde Korsit inuusuttaasa akuuffigilluarsinnaanissaat neriuutigaarput. Kalaallimmi Røde Korsiat uagullu ataatsimoorussatsinnik suliniuteqarutta iluaqutaalluarsinnaasorigatsigu. Taamaattoqarsinnaassappammi Kalaallit Nunaanni inuusuttut nukissaqartunik maligassiuilluartunillu peqatiminnut nittarsaassisoqarsinnaalerniassammat. Tamannami anguneqarsinnaasuuguni ullumikkornit naleqqiullugu amerlanerujussuit attaveqarfigineqarsinnaalerniassammata, Danmarkimi Røde Korsit inuusuttaani allaffissornermut pisortaq Anders Folmer Buhelt oqarpoq.
Kalaallit Røde Korsiatami inuusuttuaqqat nunatsinni atugarliortut inuunerissarneqarnissaanut suliniutinik VILLUM FONDEN ikiortisserineqareerluni aningaasaliisoqarpoq. Tamatumunngalu atatillugu Danmarkimi ilisimariikkat Kalaallit Røde Korsiata ujartorsimavai, tassalu Danmarkimi Røde Korsit inuusuttaasa tamakkununnga ilisimasaqarluarmata akulerunneqarnissaat periarfissaalersimalluni. Aningaasalli aporfiummata VILLUM FOND-ip aningaasaliineratigut suliniutit piviusunngorsinnaanngorput.
- Inuusuttut namminneq kajumissutsiminnik inoqatiminnik sulliserusuttunik katersuuffeqalernissaat Danmarkimi Røde Korsit inuusuttaasa ukiuni kingullerni iluatsikkiartulersimavaat. Taamaammat una suliniut tapersersorparput, tassami innuttaasut inunnik ikiortarialinnut sullisseqataasarnerat iluaqutaaqisoq Kalaallit Nunaanni aamma atorneqaleriartornissaa iluaqutaassasoq ilimagigatsigu. Kikkummi tamarmik – sualummik injuusuttut – suliniuteqarsinnaalluarput, tamattalumi akisussaaffeqartariaqaratta inuusuttunut tamanna aamma nittarsaanneqarnissaa pingaaruteqarpoq. Suliniullumi kusanartoq kikkulluunniit tapersersornatimmassuk uagut ikiuussinnaagatta nuannaarutigaarput, aningaasaateqarfik VILLUM FONDEN-imeersoq Jens-Jørgen Pedersen taama unnersiorpoq.
