Aningaasaateqarfittaaq ilinniagaqartunut atukkiisalerusuppoq
Aningaasaateqarfiup kalaallinut nunanilu avannarlerni Kalaallit Nunaannut attuumassuteqartunut tapersersuinissamik siunertaqartup tapiissutit saniatigut atukkiisarnissaq maanna angunialerpaa.
Assersuutigalugu nunani allani sivisunerusumik ilinniagaqarnernut atatillugu atukkisoqarsinnaavoq, taakkuli taarsersortariaarutissapput pineqartut Kalaallit Nunaanni piffissap ilaani sulilernissartik toqqassagaluarpassuk, taamaalillutillu ilinniagartik nunami maani atulerlugu. Tamanna aningaasaateqarfiup siulittaasuata, Eqqartuussissuserisup Michael Keldsenip, KNR-imut ilisimatitsissutigaa.
Aningaasat tunniunneqartut Kalaallit Nunaannut aamma iluaqutaanissaat Dudo aamma Povl Brandtimut pingaaruteqarsimavoq. Imaassinnaavoq ilinniartunut nunani allani atuartunut Kalaallit Nunaannut uternissamut tamanna kajumissaataasinnaasoq, taamaalillutik ilinniagartik maani atorsinnaaniassammassuk aningaasat atukkatik utertillugit akilissanngikkunikkit, taanna oqarpoq.
Aningaasanik atukkisalernissamik isuma suli isummersorfimmiittoq Michael Keldsenip naqissuserpaa.
Siulersuisut takoqqaarusuppaat qinnuteqaatit qassit takkussimanersut, kalaallinummi ilinniagaqartunut ukiumut 1 millionit koruunit qinnuteqartunut taassuma tunniuttartussaammagit. Aningaasaateqarfik pillugu pisortatigoortumik sapaatip-akunnerani kingullermi saqqummiussaqarnerminni siulersuisut tamanna nalunaarutigaat.
