Aningaasaateqarfik nutaaq pilersinneqaqqammerpoq

Aningaasaateqarfiup taaguutigaa Ikioqatigiitta, pilersitsisoralugit Isumaginninnermut Naalakkersuisoqarfik aamma aningaasaateqarfiit Villum fonden aamma Oak Foundation.

Pingasoriarluni ukiormanna aningaasaliisoqassaaq, aningaasanillu 10.000 koruniniit 200.000 koruuninut qinnuteqartoqarsinnaalluni.

Aningaasaateqarfiup taperserusutai tassaapput suliniutit meeqqat, inuusuttut ilaqutariillu atugaannik pitsanngorsaaqataaniartut. Taamaattumik tapiissuteqarnissani meeqqat inuusuttullu suliniutinut peqataatinneqarnissaat pingaartinneqassaaq.

Aammattaaq meeqqat ilaqutariillu nunami tamarmi pilersaarutinit iluaquserneqarnissaat isiginiarneqartussaavoq.

Inuit ataasiakkaat eqeersimaartut imaluunniit suleqatigiit amerlanngitsut pissarsitinnissaat salliutinneqassaaq, aamma piffissami sivikitsumi sivisuumilu suliniutit eqqarsaatigineqassallutik.

Pilersaarutit soorunami inernilerniagaqarlutillu anguniagaqartuussapput, aningaasaliissutissanillu qinnuteqarnissamut takisuunik allakkiornissaq imaluunniit nalunaarusiornissaq pisariaqartinneqanngillat.

Ukiuni tulliuttuni marlunni aningaasaateqarfik Ikioqatigiitta katillugit 2 millionit koruuninik agguaassissaaq. Qinnuteqarnissamullu siullermut killiliussaq tassaavoq marsip 15-iat.