"Angutivik" Danmarkimi isiginnaartitsissutigileraat
Isiginnaagassiaq Nunatta Isiginnaartitsisarfiani Nuummi siorna septembarimi takuteqqaarneqarpoq kingornalu sinerissami illoqarfinni tallimani aamma takutinneqarluni.
”Angutivik” oqaatsit marluiit atorlugit isiginnaagassiaavoq, atuakkiortumit Niviaq Korneliussenimit allataalluni kalaallillu angutip nutaaliaasup ukiuni untritilinni nutaani qanoq ittuunera oqaluttuarineqarpoq.
Imminik kinaassutsiminillu paasinninnera arnamullu, meeqqaminut siuaasaminullu qanoq atassuteqarnera isiginnaagassiami sammineqarpoq.
AAMMA ATUARUK Angutivik angalalerpoq
Isiginnaartitsisartut Klaus Geislerip, Kristian Mølgaardip, Hans Henrik Poulsenip Miki Jakobsenillu isiginnaagassiaq Danmarkimi angallatissavaat Aarhusimilu maajip arfineq-pingajuani isiginnaartitseqqaassapput.
Aarhusimi Teater Svalegangenimi sapaatit akunnerat ataaseq isiginnaartitsisinnarlutik kingorna Odense, Aalborg Københavnilu tikissavaat.
