Isiginnaagassiaq Angutivik angalalerpoq
Nunatta Isiginnaartitsisarfia Nuummi tallimanngorneq kingullermi takutitseqqaarneqarpoq, Niviaq Korneliussenillu manuskriptiliaa isiginnaartitsisartunit sisamanit isiginnaartitsissutigineqartoq 500-ngajannit isiginnaarneqarpoq.
Isiginnaartitsiartorlutillu angalasut Maniitsumut pingasunngormat isiginnaartitsiartorput. Tassanilu isiginnaariartut amerlangaarmata isiginnaariarniaraluartut ilaat isersinnaasimanngitsut, angalaarnermut aqutsisoq, Gerth Lyberth KNR-imut oqarpoq.
Isiginnaartitsisartullu sisamat, tassaasut Hans-Henrik Suersaq Poulsen, Klaus Geisler, Kristian Mølgaard Miki Jakobsenilu, Sisimiut kulturikkut illorsuaanni Taseralimmi unnugu isiginnaartitsissapput.
Angutivik Aasianni arfininngorpat takutinneqassaaq, Ilulissanilu ataasinngorpat takutinneqassalluni.
Isiginnaartitsiartorlutik angalasut Avannaani angalanerata kingorna Kujataanukassapput. Isiginnaagassiarmi Kommune Kujallermi marloriarluni takutinneqassaaq. Tamatumalu kingorna isiginnaagassiamik takutitsisaqattaarluni angalaneq Paamiuni septembarip ulluisa 28-anni naggaserneqassaaq.
