Angutiviaq unioqqutitsilluni toqunneqartoq
Qimmip inaata ilua aagasappoq. Qimmeq peqanngilaq, aaginnaaneratali takutippaa nuanninngilluinnartumik pisoqarsimasoq. Qimmiutilik Lone Kristensen Sisimiut aviisianut Sivdlek'-mut oqaluttuarpoq. Qimminik toqoraasumit misilittagaqanngitsumit toqunneqarsimavoq.
Allattoq Najaaraq Egede
juunip 23-at 2011 13:00
Lone Kristensenip pisoq Qeqqata Kommunianut maalaarutigaa. Maalaarutaa Qimusseq-mit, toqutsineq unioqqutitsinertut isiginnittunit tapersersorneqarpoq. Maannamulli maalaarut akineqanngilaq.
Qimmit qimuttut aamma qimmeqarneq qitsuuteqarnerlu pillugit Inatsisartut inatsisaat naapertorlugu qimmiutillit qimminik toqoraasumik ilisimatinneqareernermik kingorna qimmiminnik angalaannartunik pitussinissaminnut minnerpaamik ulloq unnuarlu periarfissinneqartussaapput. Taamaakkaluartoq Lone Kristensen, qimmilivimmini aammik takugami, kingornalu qimmimi illuaraata ilua aaginnaasoq takugamiuk, qimmiminik pitussinissaminut ulloq unnuarlu periarfissinneqarsimanani paasivaa. Qimmeq peqanngilaq, aalli takutippaa nuanninngilluinnartumik pisoqarsimasoq, Sivdlermi allaaserisaq aallartippoq.
- Taama pisoqarsimanera tupannaqaaq. Nalunngilara qimmiutiga qimmeqatinilu paasimallutik anniaateqartoq, taamaariarmallu pitoqqanani ersilluni illuaqqaminiittoq. Ersingaarami qarmaraluarlugu anillanneq ajorpoq. Taamaanneq ajoraluarpoq. Killorluinnaanik qimminik toqoraasut ullut tamaasa saneqqukkaangamik qimmeq qiimmaareqisoq nujueqisorlu quujagisarpaat, Lone Kristensen oqaluttuarpoq.
- Toqutsisimaneq pillugu qimminik toqoraasup nassuiaataa paasisinnaanngilluinnarpara, oqarpoq.
Sisimiut Kommuniata entreprenøreqarfiani qimminik nakkutilliisuusimasup David Møllerip qimmimik toqutsisimaneq oqaaseqarfigerusunngilaa, Sisimiunilu qimminik nakkutilliisut ilaat, Rasmus Olsen, saaffigineqarsinnaaneralugu. Taannalu isumaqarpoq, Lone Kristensenip qimmia Sisimiuni sumiiffinni assigiinngitsuni akornutaasimasoq, Qivittoqarfimmiillu maalaaruteqartoqareerneratigut qimminik toqoraasumit misilittagaqanngitsumit toqunneqarsimasoq.
- Qimminik toqoraasoq siullermeertumik aallaagami uniorpaa, qimmerlu qimaasillugu. Qimmilivimmut qimaavoq, apuukkamilu aassunnikkami qimmeqatinilu paallutik,Rasmus Olsen isumaqarpoq.
Tamatuma kingorna allatut ajornartumik qimminik toqoraasup qimmeq illuaqqamiittoq aallaammik kaliber 22.-mik toquttariaqarsimavaa.
-Taamaammanuna illuaraq aaginnaasoq, Rasmus Olsen Sivdlek'-mut oqarpoq.
Qimuttunik qimmiutillit peqatigiiffianneersoq Stefan Hammer pisumik kusanaaginneqaaq.
- Naluara qassit taamatut nalaataqarsimanersut. Naluarpummi. Nalinginnaasumik qimmiutillit qimmiminnik maqaasisaqartarput, qanorli toqunneqarsimanersoq, toqunneqartiganilu qasseriaq ikilerneqarsimanersoq nalinginnaasumik paasineq ajorparput. Qimminik toqoraasut qimminik angalaannartunik toqutsereeraangamik puussiarsuarmut ikisarpaat, ikuallaavimmukaattarlugulu. Taamaalilluni uppernarsaataasinnaasut tamarmik annaaneqartarput. Suliami matumani akerliuvugut, isumaqaratta ingasalluinnartoq, Stefan Hammer oqarpoq
Lone Kristensen, qimmimi, isummani naapertorlugu assinganik taarserneqarsinnaanngitsoq, toqunneqarsimaneranut taarsiiffigitinnissaminik neqeroorfigineqarsimanngilaq.
