Angutit piukkunnaatillit assammik arsarnermi nunanut allanut unammisartortaalerput nunanit tamalaanit aningaasaliiffigineqartumik
Angutit inersimasut nunanut allanut unammisartoqarput. Qanittumilu taakkununnga tapertaasussanik U-20-nik nunanut allanut unammisartoqalissaaq.
Assammik arsarnermi nunat tamalaat kattuffissuat IHF nunanut siuarsagassanut upernaamut agguaaniarpoq tassanngalu Nunarput pissarseqataasussanngorpoq.
Nunat kalaallit eqimattameeqatissaat
Cuba
Guadaloupe
Haiti
Mexico
St. Kitts aamma Nevis
Trinidad aamma Tobago
U-20-ni nunanut allanut unammisartoqartilissavai taakkulu nunanik unammisassaqalereerput.
- Nunat tamalaat kattuffissuat IHF tapiissuteqarniarmat kattuffitsinnut aningaasartuutaavallaanngitsumik U-20-ni nunanut allanut unammisartoqarsinnaalerpugut, TAAK-mi siunnersorti Akutaaneq Kreutzmann KNR-mut nassuiaavoq.
Nunarput Amerikap avannaamiut Caribiamiullu kattuffiannut NACHC-mut ilaasortaavoq.
NACHC-mi ilaasortat eqimattanut marlunnut avinneqassapput taakkunanilu ajugaasut IHF Tropheemik taaneqartartumut anngutissapput.
Nunanut allanut unamminermi misilittagartusarneq
Unammersuarneq taanna tassaavoq nunat siuarsagassat Nunatsitut ittut nunarsuaq tamakkerlugu unammersuarnerat.
- Arsartutsinnut kattuffitsinnullu tusagaq nuannerpoq tapiiffigineqarluta nunanut allanut unammisartunik angalatitsisinnaalissagatta, Akutaaneq Kreutzmann oqarpoq.
Nunarput siornatigut arnani angutinilu inuusuttuni nunanut allanut unammisartoqarpoq. Taakkuli tamarmik aningaasaqarniarneq pissutigalugu unitsinneqarnikuupput.
Akutaaneq Kreutzmann siornatigut pikkorinnerni unammisartuusoq ilimasuppoq inuusuttut nunanut allanut unammisartui inersimasortaasunut tapertaalluassasut.
- Inuusuttut pikkorinnerpaat inersimasuni peqataasarumaarput allalli inuusuttunut nunanut allanut unammmisartut angalaneranni sungiussiniarfittut atorsinnaassavaat. Qularinngilara aamma unammmisartut amerlanerpaartaasa nuannaarutigissagaat inuusuttut nunanut allanut unammisartoqalernissaat, Akutaaneq Kreutzmann oqarpoq.
Inuusuttut nunanut allanut unammisartut sungiusaasussaannik TAAK toqqaaniartussanngorpoq. IHF aamma ilisimatitsivoq arnat inuusuttut nunanut allanut unammisartoqalernissaat aappaagu aningaasaliiffigineqarumaartoq.