Angutit nunaqarfimmiut angutinit illoqarfimmiunit mikinerusarput
Meeqqat inersimasunngorunik qanoq angitigilernissaannut qanorlu oqimaassuseqalernissaannut peroriartornerat pingaarutilerujussuuvoq.
Tamanna misissuinermi nutaami Syddansk Universitetimi, Innuttaasut peqqissusaannik misissuisarfimmi, ilisimatusarnerup nutaap ersersippaa. Ilisimatusarnermi matumani Nunatsinni peroriartornerup, angissutsimut oqimaassutsimullu qanoq sunniuteqartarnera misissuiffigineqarpoq.
- Angissutsimut sunniuteqartartut, ilaatigut taaneqarsinnaasut ilagaat, naartuunerup meeraanerullu nalaani nerisat nappaatillu. Taamaattumik innuttaasunut tamatumannga eqqugaanissamut qaninnerusunut, inuuniarnikkut atuagassarititaasunik pitsanngorsaanissaq, ingammik nunaqarfimmiunut pingaaruteqartoq, Peter Bjerregaard, Innuttaasut peqqissusaannik misissuisarfimmi ilisimatooq naliliivoq.
Qanoq peroriartorsimaneq ingammik angissutsimut sunniuteqartarpoq. Assersuutigalugu misissuinikkut paasineqarpoq, inuunermi atugassarititaasut nalinginnaasut, soorlu qanoq ilinniagaqarsimaneq, ineqarnermi pissutsit, nerisat ilaatigullu imigassamik ajornartorsiuteqarnerit, meeqqat angissusaannut sunniuteqartartut.
Angissuseq oqimaassuserlu peqqinnissamut pingaaruteqaqaat. Tassami inuit angisuut uummatimikkut qaratsamikkullu taqqamikkut milittoornissamut ulorianartorsiunnginnerusarput, inuilli pualavallaat sukkornermik, uummatimikkut taqqamikkullu napparsimalernissamut qaninnerusarlutik.