Angutit marluk annertuumik ikiaroornartulerisimasutut pineqaatissinneqarsimasunut inissiisarfimmiittussanngortinneqartut
Angutit marluk kujataaninngaanneersut, 39-nik 49-nillu ukiulik piumasaqaatitaqanngitsumik qaammatini arfinilinni aamma ukioq marluk qaammatillu arfinilinnik Nunatta Eqqartuussisuuneqarfiani pineqaatissinneqarsimasunut inissiisarfimmiittussanngortinneqarput.
Angutit taakku annertuumik ikiaroornartulerinerata kingorna eqqartuussineq pivoq, siullermik aappariit tigusarineqarput taakku ukiut marluk ukiullu sisamat ikiaroornartulerisimasutut tillitanillu pisisimasutut piumasaqaatitaqanngitsumik pineqaatissinneqarsimasunut inissiisarfimmiittussanngortinneqarput.
AAMMA ATUARUK Angutip 53-inik ukiullip ikiaroornartunik iioraasimanini toqqutigigaa
Aalborg Havnimimi ilanngaaserisut siorna oktobarimi aningaasat 7,8 millionit koruunit poortukkat akornanni nassaarineqarnerata kingorna taakku tigusarineqarput.
Aappariit inissiisarfiimmiitinneqarnerata nalaani paasissutissanik nutaanik takkuttoqarpoq. Angut inissiisarfimmiitinneqartoq angunnik allanik marlunnik kujataaninngaaneersunik ikiaroornartunik tuniniaanermut attuumassuteqartoqartoq nassueruteqarpoq.
Taakku angutit marluk ullumi eqqartuussaapput.
Pineqaatissiissut iluarisimaaraa
Taakku Kujataani Eqqartuussisoqarfimmi septembarimi eqqartuunneqaramik, pineqaatissinneqarsimasunut inissiisarfimmiittussanngorput, aappaa aatsaat pinerluuteqaqqikkuni qaammatini sisamani, aappaali piumasaqaatitaqanngitsumik ukiuni pingasuni. Eqqaartuussutilli taakkua marluk unnerluussisussaatitaasut Nunatta Eqqartuussisuuneqarfianut suliassanngorteqqippai.
Ullumili tallimanngornermi eqqartuunneqarput. Eqqartuussaasup aappaa sakkortunerusumik pineqaatissinneqarpoq, appaa sakkukinnerusumik pineqaatissinneqartoq. Angutit taakku marluk ikiaroornartumik 10 kilomit annertunerusumik tuniniaasimasutut pineqaatissinneqarput.
- Angutit marluk ikiaroornartumik tuniniaasimanerminnut tunngatillugu eqqartuunneqarnerata inernera naammagisimaarpara. Ikiaroornartunik qanorluunniit annertutigisunik annikitsigisunilluunniit tuniniaaneq unioqqutitsinerulluinnartoq Nunatta Eqqartuussisuuneqarfiata naqissuserlugu erseqqissumik iliuuseqarfigaa, Kalaallit Nunaanni politiineersoq, Lars Petersen oqarpoq.
