Angutit inersimasut isikkamik arsaallutik Nunatsinni pissartanngorniunnissaat ullumi aallartissapput
Kikkut puljeqatigiissanersut makitsissutigineqarmat IT-79, Nuummeersut, siorna bronzinnattut, B-67-ilu pulje 2-mut inissipput, T-41 K-33-lu puljeqatigilerlugit.
Pissartanngorniunnernik aaqqissuisut Kugsak-45 pulje 1-imut inissippoq. Taakku siorna pissartanngorniuttoqarnerani finalimut annguttut FC Malamuk, Uummannameersut puljeqatigaat, soorlu aamma G-44 Qeqertarsuaq, siorna normu 4-nngortut, pulje 1-imiittut. ATA, Tasiilameersoq, pissartanngorniunnernut peqataasussaagaluarput, aningaasaqarniarnikkulli ajornartorsiuteqarnertik pissutigalugu pissartanngorniunnernut peqataasinnaajunnaarput, SAK, Sisimiuneersoq, taarsiullugu peqataasussanngorluni.
Unamminerit KNR TV-kkut aallakaatinneqassapput
Pissartanngorniunnerni unamminissap siulliup KNR-TV-kkut aallakaatinneqarnera ualeru nalunaaqutaq ataatsimut tanneq qulingiluanut, 12:45, aallartissaaq, unammineq ataatsimut aallartissalluni. Tassa Kugsak-45 SAK-mut unammissagami.
Taamaalereerpat T-41 B-67-imut ualeru nalunaaqutaq pingasunut unammissaaq. FC Malamuk G-44-mut tallimanut unammissalluni. Pissartanngorniunnerit ulluisa siullersaanni unamminissaq kingulleq unnugu nalunaaqutaq arfineq-marlunut aallakaatinneqarumaarpoq, K-33 IT-79-imut unammissagami.
