Angutit assammik arsarlutik nunanut allanut unammisartut unammersuarnissamut piareersalersut
Kalaallit aatsaat taama piareersimatigillutillu sakkortutiginissaat, nunanut allanut unammisartut sungiusaasuata Niels Møllerip neriuutigaa. Aviisi Frederiksborg Amtsavis taama allaaserisaqarpoq.
Minik Dahl Høegh Angutimmarik Kreutzmannilu ajoqusersimanertik pissutigalugu ukioq ataaseq unammeqataasarsimanatik maanna peqataaqqilissapput, Uruguayimilu aasaru unammersuartoqarnerani nunat pingasut nunarsuarmi pissartanngorniunnissamut anngussinnaassallutik. Qatarimi 2015-imi nunarsuarmi pissartanngorniuttoqartussaavoq.
Kalaallit Nunaat nunarsuarmi pissartanngorniunnerni 2007-imi siullerpaamik peqataavoq, Tysklandimi pissartanngorniunnerni peqataagami, tamannalu maanna anguniarneqaqqissaaq:
- Ajornakusoorsinnaavoq. Tassami Brasilia, Argentina, Chile aamma Cuba nunarsuarmi pissartanngorniunnernut anngukkajuttartuupput, Kalaallit Nunaatali ukiup massuma aallartilaarnerani angusai isumalluarnarsisitsipput, Niels Møller Frederikseborg Amtsavisimut oqarpoq.
Tassami Amerikap nunavittaani unammersuarnissamut anngunniuttoqarmat kalaallit Cuba ajugaaffigaat:
- Kalaallit Nunaat Cubamut siullerpaamik ajugaavoq, puisinniartartunullu ajorsarsimanertik Cubamiut ajuusaarutigeqaat, Niels Møller oqarpoq, nangillunilu:
- Akiniaarusussaqaat, taamaammat neriuppunga gruppeqatigissanngikkivut, nunanut allanut unammisartut sungiusaasuat oqarpoq.
Amerikap nunavittaani unammersuartarnerni Kalaallit Nunaat nunat pikkorinnerit tallimat akornanniittoq, Niels Møllerip nalilerpaa, Nunattalu makitsinikkut iluatsitsilluarsinnaanissaa taassuma neriuutigaa.
