Angutip nalusama tamataqanngitsunga assiutingaanga
Kaaka Lynge-Larsenip tamanna qaammatip siuliani misigaa. Mobilia inatsisaatsuliorluni iserfigineqarsimavoq assiutaalu internetsikkut siaruarterneqarsimalluni.
- Allaasimasinnaagaluarpoq uanga nammineq nassiussuillunga taamatut pisimasuugaluaruma ingammik inunnut nalusannut. Kisianni nammineq piumassuserinngisamik taamatut misigisaqarluni nuanniitsorujussuuvoq, Kaaka Lynge-Larsen KNR-imut oqarpoq.
Taanna angutip ilisarisimanngisaata internetsimi inuit naapittarfiisigut saaffigaa. Kaaka Lynge-Larsen tamataqarani imminut assilisimavoq assingalu angutip pissarsiarisimagaa, inuttaata ilisimanngilaa. Angutillu aatsaat apeqqutigimmagu paasilerpaa, assini internetsimi takussaasoq.
- Asseq taanna uanga computerinnut nuunnikuunngisaannarpara. Mobilinniiginnarnikuuvoq. Naluara iCloudikkut arlaatigut nuussimassanersoq, iPhoneugami mobilera.
Tassalu assinga oqarasuaataaniit assinik toqqorterivimmut, nunani allaniittumut, nammineerluni nuussimasinnaavoq.
Aamma atuaruk Tamataqanngitsunik assinik nassiussinissat Politiit mianersoqqussitigaat
Misigisapilunilu ilinniarfigaa.
- Asseq taanna uanga mobiiliinnani pigivara. Sapaatip akunneri pingasut missaa mobiilinnippoq. Taamaattumik sapinngisamik mobilimi taamak ittumik assiuteqarnaveersaarluni taamak pisoqartikkusunngikkussiuk, Kaaka Lynge-Larsen oqarpoq.
Politiit tamataqanngitsunik assilisanik filmilianillu siammarterisoqarsimaneranik nalunaarutinik marlunnik sapaatip akunnerata siuliani tigusaqarsimapput. Taamaattumillu siammarterinaveersaarnissaq mianersoqqussutigalugu, ilisarisimasanulluunniit.