Angutip kalaallip 44-nik ukiullip anaanaminik savimmik toqutsisimanini nassuerutigigaa

Ilanngutassiaq Østjyllandimi politiinit paasissutissartalerlugu nutarterneqarpoq.

Angutip kalaallip 44-nik ukiullip sisamanngornermi ualikkut inatsit tunngaviusoq naapertorlugu killisiorneqarami anaanaminik toqutsisimanini nassuerutigaa.

Ekstra Bladet taama allaaserisaqarpoq.

Taassuma anaanani savimmik qungasiatigut pukusuatigullu kapillugu toqussimallugu Aarhusimi eqqartuussivimmi nassuiaatigaa.

Ekstra Bladetip allaaserisaa naapertorlugu inatsit tunngaviusoq naapertorlugu killisiuineq arlaleriarlugu kinguartinneqarpoq, tassanilu toqutsisutut pasineqartumut kalaallimik oqalutsimik amigaateqarneq pissutigineqarluni.

Angut sapaatini akunnerni sisamani parnaarussivimmi paarineqartussanngortinneqarpoq. Østjyllandip Politiivi Twitterikkut allapput.

Toqutsisutut pasineqartup tigummineqartussanngortinneqarnini eqqartuussisuuneqarfimmut aalajangeqqitassanngortinngilaa.

Sumiiffimmi toqusimasutut nalunaarutigineqartoq
Politiit pingasunngornermi unnukkut nalunaaqutaq 23.12 nalunaarfigineqareersullu arnaq Aarhusip avannaata kitaani Sabromi toqutaasimasoq nassaaraat.

Politiit najukkamut ornigupput tassanilu arnaq toqutaasimasoq erngertumik paasineqarpoq. Taanna toqusimasutut nakorsamit sumiiffimmi nalunaarutigineqarpoq.

Angut eqqissisimasumik erngertumik tigusarineqartoq, Østjyllandip Politiivisa sisamanngornermi tusagassiuutinut nalunaarutigaat.

Politiit unnuamut Sabromi najukkamiipput. Teknikkikkullu misissuinerit sisamanngornermi ullaakkut naammassineqarlutik.

KNR Østjyllandip politiivinit oqaaseqartitsiniaraluarpoq, taakkuli inuit suliamut attuumassuteqartut pillugit uppernarsaarusunngillat.