Anguteq Ittuk angalajunnaarsitaagallarpoq
Umiarsuaaraq ingerlaannartumik peerneqartariaqarpoq, taamaammat usit assartugassat sapaatip akunneranik ataatsimik kinguaattoornissaat, Kujataani innuttaasut piareersimaffigisariaqarpaat. Royal Arctic Linep nunaqarfinnut kiffartuussivia taama ilisimatitsivoq.
Oquk qanoq ittuunersoq, aamma peqqinnissamut navianaateqarnersoq, suli ilisimaneqanngilaq. Imarsiortut peqqinnissaat eqqarsaatigalugu umiarsuaaraq Nuummukartinneqassaaq, tassami tamakkuninnga misissuinissamut ISS akuerisaavoq, umiarsuaaqqamilu ajoquserneqarsimasinnaasut iluarsaanneqassammata.
Umiarsuaaraq Johanna Kristina Kujataanut sapaatiuppat apuutissaaq, usinillu assartugassanik taqqavani angallassissalluni. Assartugassat sapaatip akunnerani uani apuuttussaagaluit Kujataani nunaqarfinnut qaqugorpiaq anngutissanersut suli ilisimaneqanngilaq.
