Angut utoqqasaaq Qaqortumi ujajaaffigineqartoq

Angut 65-inik ukioqartoq imerniartarfimmit ullaassakkut nalunaaqutaq 3.00-4.00 missaani angerlartilluni angutit marluk naapippai. Angerlarluni tammartajaarami angutinut taakkununnga ikioqqusimavoq.

Angutit taakku marluk Augo Lyngesvejimit Nakkartarfimmut majuartarfikkut majuaqatigai. Angullu utoqqasaaq angutit taakku marluk akornanni pisuppoq. Aappaa siulliulluni majuarpoq aappaalu tunuani pisulluni. Majuartarfiit qaqigamikkit aappaa unippoq, tunummullu saassinnarluni angut kaasarfissiulerpaa aningaasivialu 2.700-3.000 koruuninik imaqartoq tillillugu. Angutit taamaalisinnarlutik angut qimassimavaat, Kujataata politiivi tusagassiorfinnut nalunaaruteqarlutik taama allapput.

Suliaq suli misissuiffigineqarpoq, innuttaasullu ujajaaneq pillugu ilisimasaqarunik politiinut saaffiginneqquneqarput.

Ujajaasut ima isikkoqarput:

A: Angut kalaaleq, 18-20-t miss. ukioqartoq, 180 cm missaannik angitigisoq tuattorlu.

B: Angut kalaaleq, 18-20- miss. ukioqartoq, 175 cm missaannik angitigisoq nerinnalaartorlu, qaqortumik kavaajalik.

Qaqortumi politiit oqarasuaatikkut 70 11 22-mut attavigineqarsinnaapput.