Angut toqutsisuusimannginnerarpoq

Politiit misissuinertik naammassereermassuk angut tallimanngormat iperagaavoq.

Angut persuttaarujussuarsimasutut - toqumilluunniit kinguneqartumik persuttaasimasutut - pasineqarpoq.

Allakkap unnerluussutip sapaatip-akunnera ataaseq qaangiuppat naammassineqarnissaa naatsorsuutigineqarpoq.

Persuttaanermut inatsimmi ukiuni pingasuni parnaarussaasoqarsinnaavoq, toqumik kinguneqartumik persuttaasimagaanni ukiut qulit tikillugit parnaarussaasoqarsinnaalluni.

Angut 59-inik ukiulik, arnaatimi, 52-inik ukiullip, Karen Olsvigip, saniani marsip ulluisa 17-ianni iterami politiit nammineq attavigai, aappani unnuap ingerlanerani toqusimasoq nalunaarutigalugu.

Qaratsamigut aanaartoorluni toqusimanerarneqarpoq, toqusunilli misissuisartut takusinnaavaat, Karen Olsvig niaqqumigut arlaannik anaaneqarsimasoq.

Karen Olsvig angullu pasineqartoq tamarmik kalaaliupput. Ukiorpaalunni inooqatigiissimapput, arlaleriaqalutik eqqissiviilliortitsillutillu imminnut persuttaattarlutik, politiillu ataasiaannaratik orniguttariaqartarsimapput.

Angut 59-inik ukiulik aapparminut persuttaasimasutut arlaleriarluni eqqartuussaareersimavoq.