Angut Sisimiuni toqutsisimasutut pasineqartoq
Sisimiuni Politiit arnaq inissiami ilisimanngitsoq pillugu sisamanngornermi nalunaarfigineqarput. Pineqartoq tassaavoq arnaq 73-inik ukiulik, taannalu toqusimasutut nalunarutigineqarpoq.
Suliamut atatillugu pinerluuteqarsimasorineqartoq politiinit maanna tigummigallarneqarluni pasineqarpoq.
Kalaallit Nunaanni Politiit tusagassiuutinut nalunaarummi allapput.
Angut pineqartoq 30-t sinnerlugit ukioqarpoq, taannalu eqqartuussivimmut ippassaq unnukkut sassartinneqarpoq. Politiillu angut ulluni 27-ni tigummigallarniarpaat.
- Angut sassartinneqarnermini suleqatiginnikkusuppoq, eqqartuussiviullu tigummigallaasoqarnissaanik aalajangiinera akueralugu, politiit allapput.
AAMMA ATUARUK Sisimiut: Arnaq toqungasoq inissiami nassaarineqartoq
- Piffissamit pinerluuteqarfiusimasorineqartumit akunnerit 24-t qaangiutinnginneranni suliamut atatillugu pinerluuteqarsorineqartumik pasisaqarlutalu tigummigallaalernerput ilorrisimaarutigaara
Politiit misissueqqissaartartuisa pisortaata tullersortaa, Bjørn Bjerregaard oqarpoq.
Sisimiuni Politiit Danmarkimit pinerluttulerinermut tunngasuni misissuisartut marluk toqusumillu misissuisartoq suliap ilungersunarnera pissutigalugu misissuiartorlutik tikissapput.
Taakku Sisimiunut tallimanngornermi marsip ulluisa tallimaanni tikinnissaat pilersaarutaavoq.
