Ujaasineq: Angut Nanortalimmit tammartoq

Angut tallimanngormalli maqaasineqalerpoq. Kujataani Nanortalimmit umiatsiamik Pocamik qaqortumik aallarpoq kujammullu ingerlasimanissaa ilimagineqartoq Kalaallit Nunaanni Politiit pigaartuisa pisortaat Mark Larsen marlunngornermi ullaakkut oqarpoq.

- Angut Pocamik qaqortumik umiatsialik tammaaneqarpoq, taannalu Nanortalimmit tallimanngornermi ualikkut kujammut aallarsimagunarluni. Tamanna ilimagaarput, kisianni ilisimanngilarput aallarmammi takuneqarsimanngilaq takoqqinneqarsimananilu.

- Nanortalimmit kujammut sammisumik qulimiguulimmik angallammillu ippassarli ujarparput, iluatsinngitsumilli, Mark Larsen oqarpoq.

Issittumi Sakkutooqarfik ujaasinermik ingerlatsisuuvoq, najukkamili najugaqartunit angummik aamma ujaasisunit ikiorneqarluarluni.

Angut suli nassaarineqanngikkaluartoq ujaasineq ullumi ingerlaqqissasoq, pigaartut pisortaat oqaluttuarpoq.

- Ujaasineq ullumi ingerlateqqissavarput, sumiissinnaaneranillu ilimagisagut sumiiffiit tamaasa ujaasiffiginissaasa tungaannut ujaasissalluta. Kujataani Nanortalimmiit imaatigut ingerlaarfiusinnaasimasut tamangajammik ujaasiffigereerpagut.

- Maanna sumiiffimmi annertunerulaartumi ujaasilluta misilipparput, pigaartut pisortaat oqarpoq.

Ujaasineq qaqugu unitsinneqassanersoq ilumullu unitsinneqassanersoq Issittumi Sakkutooqarfiup aalajangigassarigaa politiit ilisimatitsipput. Ujaasineq pillugu politiit massakkut oqaaseqarnerusinnaanngillat