Nanortalimmi Cáfe 44-mik ikuallatsitsisimasutut 19-inik ukiulik nassuertoq

Nanortalimmi Café 44 sapaatip akunnerani uani marlunngornermi ullaakkut ikuallannermi kingorna annertuumik ajoquserpoq.

Nanortalimmi politiit KNR-imut ilisimatitsissutigivaat angut 19-nik ukiulik marlunngornermi unnukkut tigusarineqarsimasoq. Angut pineqartoq januaarip aallaqqaataani killisiorneqarluni ikuallatsitsisuunerminut nassuersimavoq. Politiillu angut iperarniarlugu kingorna aalajangersimapput.

AAMMA ATUARUK Nanortalimmi Café 44 piaaraluni ikuallatsinneqarsimasinnaasoq

- Suliami makkunatut ittuni qanoq pisoqassanersoq politiit naliliisarput. Uanilu aalajangersimavugut iperarniarlugu, Nanortalimmi politiini suliatigut ataqatigiissaarisoq, Teddy Pless, taama oqarpoq.

Angut 19-nik ukiulik, suliaq politiinit allaffissornikkut piareersarneqareerpat, eqqartuussivimmut tunniunneqassaaq.

Nanortalimmi Cáfe 44 aatsaat siullermeertumik ikuallatsinneqanngilaq.

Cáfe 44-mmi illutaa, pisiniarfillu ungasinngisaaniittoq Butik 44 aamma siorna maajip qaammataani ikuallatsinneqarput.

AAMMA ATUARUK Nanortalimmi illunik marlunnik piaaraluni ikuallatsitsisoqartoq

Camilla Palmann, Kalaallit Nunaanni Politiit paasissutissiisartuat, KNR-imut taamani ima oqarpoq:

- Butik 44-mi Café 44-milu piaaraluni ikuallatsitsisoqarsimanera ilisimatitsissutigisinnaavarput. Butik 44 Café 44-lu imminnut 100 meterinik ungasissuseqarput.

Teddy Plessip KNR-imut ilisimatitsissutigivaa angut 19-nik ukiulik siorna maajimi ikuallatsinneqartunut aamma killisiorneqarsimasoq. Angulli taakkununnga ikuallatsitsisuunnginnerarsimavoq.

Taamaalilluni Cáfe 44-mik aamma Butik 44-mik siusinnerusukkut ikuallatsitsinikuunerit maannamut suli kimit ikuallatsinneqarsimanersut paasineqanngilaq.