Nanortalimmi Café 44 piaaraluni ikuallatsinneqarsimasinnaasoq
Nanortalimmi Café 44 marlunngormat ullaakkut ikuallappoq.
Politiit qatserisartullu ikuallaffimmut marlunngormat ullaakkut arfineq-pingasunut qiteqquttoq orniguttut politiineersoq Malik Olesen KNR-imut paasissutissiivoq.
- Café 44-mi ikuallanneq qatserneqarpoq inunnillu ajoqusertoqarnani, Malik Olesen oqarpoq.
Café 44 ajoquserujussuarsimasoq Facebookkimi assini takuneqarsinnaavoq.
Sooq ikuallalersimanersoq Nanortalimmi politiinit misissorneqartoq, piaaralugulu ikuallatsinneqarsimagunartoq, politiineersoq oqaluttuarpoq
- Piaaraluni ikuallatsitsinermut ilimasunneq tunngavigalugu sulipput, Malik Olesen oqarpoq.
Suliarli suli misissorneqarmat annerusumik oqaaseqarsinnaanani politiineersoq oqarpoq.
Café 44 qaqugu ammaqqissanersoq Café 44-mik ingerlatsisut Facebookkikkut allapput.
- Naluneqanngitsutut cafe 44 ikuallappoq, nalugallarparput qaqugorpiaq ammaqqikkumaarnerluta. Isertartugut nuannisarluartartut ajunnginnerpaamik kissaapassi, minnerunngitsumik nunatsinniit nipilersortartorpassuit tikeraartorisartakkagut tamassinnut qujanarujussuaq, Café 44-p Facebookkimi quppernerani allaqqavoq.