Politiit ullormut nalunaarutaat: Angut mittarfissuarmi aningaasarpassuarnik nassartoq tigusarineqartoq
Nuup mittarfissuani Kalaallit Nunaanni politiit marlunngormat tigusarinnipput.
Angut 32-nik ukiulik aningaasarpassuarnik nunatsinnit annisseriaraluartoq pineqarpoq.
Taama politiit tusagassiuutinut nalunaaruteqarput.
Kaaviaartitanik malunnarunnaarsaasoqarnera
Angut qanoq amerlatigisunik aningaasanik annisseriaraluarnersoq politiit paasissutissiissutiginngilaat, aningaasalli amerlasuut pineqarmata mittarfissuarmi nakkutilliisut arajutsinngilaat.
-Aningaasarpassuit pineqarput, 32-nillu ukiulik Eqqartuussisoqarfik Sermersuumi ippassaq pingasunngornermi maajip ulluisa 28.-anni killissiorneqarpoq, suliamut atatillugu akisussaasoq Malik Sandgreen taama oqarpoq.
Eqqartuussisup angut ulluni 28-ni tigummigallarneqarnissaanik suliniuteqarpoq, politiilli eqqartuussineq matoqqasuummat annerusumik paasissutissiinngillat.
Aningaasanilli pinerluutaasorineqartunit taakkunanngalu malunnarunnaarsaasoqarnera angummut pineqartumut unnerluutiginnittoqarpoq.
