Angut meeqqanut kannguttaatsuliortarnermi kingorna paarineqartussanngorlugu eqqartuunneqartoq

Angut 37-nik ukiulik Sisimiuneersoq, nukappiaqqanut ukiukitsunut kinguaasiuutitigut kannguttaatsuliortarnermi kingorna paarineqartussanngorlugu pineqaatissinneqarpoq.

Taamak Kalaallit Nunaanni unnerluussisussaatitaasut inoqatinut attaveqaqatigiittarfikkut X-ikkut allapput.

Suliaq Qeqqata Eqqartuussiviani inaarpoq.

Eqqartuussivik naapertorlugu kannguttaatsuliornerit 2021-miit 2024-mut pisimapput. Pinerlineqartut ilai nukappiaraapput 13-iniit 17-it tikillugit ukiullit. 

Angut pineqartoq meeqqanik innarliinermut atortussanik amerlasoorpassuarnik pigisaqarsimanerarneqarpoq. Sermitsiamit suliaq pillugu siornatigut allaaserineqareernikuuvoq.

Allagaq unnerluussut, Sermitsiap allagaatinik takunnissinnaaneq atorlugu pissarsiaa malillugu, angut pisunut katillugit 66-inut unnerluunneqarpoq, tassani kannguttaatsuliornerit innimiilliornerillu.

Angut pinngitsaaliilluni kujannissimasutut kiisalu inummut 18-it inorlugit ukiulimmut akiliilluni kinguaassiuutitigut atoqateqarneq pillugit aamma unnerluunneqartoq, tusagassiorfik allappoq.

Nukappiaqqat aqqanillit pinerlineqartut

Unnerluussut naapertorlugu suliami nukappiaqqat aqqanillit innarlerneqartuupput.

Suliami teknikkimik atortorissaaruterpassuit misissorneqarput. Paasiniaanermi  pineqaatissinneqartup innarlerneqartullu akornanni inoqatinut attaveqaqatigiittarfikkut allaffigeqatigiittarneri politiinit misissoqqissaarneqartut, Sermitsiaq allappoq.

Tassani politiit National Kriminalteknisk Centerimiit (NKC) ikiorneqarput.

Unnerluunneqartup kannguttaatsuliornermini amerlasuuni assiliissut toqqoqqasoq atortarsimagaa, allakkami unnerluussummi allaqqavoq. Tamakkua nalunaaqutaq itersaasartoq assiliissutitalik atorlugu pisimapput.

Immiussat taakkua ilaatigut oqaruasuaammi angallattakkami, qarasaasiami, USB-mi harddiskimilu toqqorneqarsimapput. Taakkua tamakkerlugit politiinit arsaarinnissutigineqarput.

Immiussat katiternerisa ataatsimut ullunik 41-nit ikinnerunngitsunik sivisussuseqarput.

Unnerluunneqartup immiussanik pigisaqarnini nassuerutigaa.

Angut siornatigut assingusumik unioqqutitsinikuusimasoq politiinit ilisimaneqartoq, Kalaallit Nunaanni Politiit Sermitsiamut paasititsisimapput.

Angugtip eqqaartuussut suliaqqitassanngortissimagaa, unnerluussisussaatitaasut X-imut allapput.

/ritzau/