Angut inuusuttoq Maniitsumi marlunnik toqutsisutut paarineqartussanngortitaasoq
Angut arnarlu Maniitsumi peqqarniitsumik siorna toqunneqarput. Taakku taamani 22-nik ukioqartumit angummit qasseeriarlutik kapineqarput.
Eqqartuussivimmi suliaq maanna inerniliiffiugallarpoq. Angummi inuusuttoq piffissami killiligaanngitsumi paarineqartussanngortillugu Eqqartuussiveqarfik Qeqqa inerniliivoq. Unnerluussisussaatitaasut taama paasissutissiipput.
Toqutsinerit siorna decembarimi pipput. Taamani Maniitsumi politiit pigaartui inuit marluk inuit najugaanni toqungasut nassaarineqarsimasut pillugit nalunaarfigineqarput.
Politiit sumiiffimmut ornigukkamik angut arnarlu savinnik assigiinngitsunik aappaa 39-riarluni aappaalu 70-riarluni kapineqarsimasut nassaaraat.
- Peqqarniitsorujussuarmik toqutsinerit marluk pineqarput, taamaattumik eqqartuussivimmut inatsimmi pineqaatissiissutigineqarsinnaasumik sakkortunerpaamik, tassa piffissami killiliganngitsumi paarineqartussanngortitsinissamik eqqartuussinissaq piumasaqaatigaara, politiassistent Peter Skibye-Lotz, suliami unnerluussisussaatitaasoq, tusagassiuutinut nalunaarummi oqarpoq.
Eqqartuunneqartup suliap ilaa suliassanngorteqqikkaa
Eqqartuussutip sakkukillineqaqqullugu suliareqqitassanngortinneqarpoq. Tassa imaappoq nunatta eqqartuussisuuneqarfianut ingerlateqqinneqassaaq, matumanili angut inuusuttoq pinngitsuunersoq aalajangiiffigineqassanngilaq. Eqqartuussisuuneqarfiulli pineqaatissiissut - tassa paarineqartussanngortitsineq - naleqqunnersoq aalajangiiffigiinnartussaavaa.
AAMMA ATUARUK Maniitsumi marlunnik toqutsineq: Angut inuusuttoq eqqartuussivimmut sassassasoq
Inuunerup sinnerani parnaarussassanngortitsineq kisiat assigalugu paarineqartussanngortitsineq kililigaanngitsumik pineqaatissiissutaasarpoq. Silangajaartunut pinerluuteqarsimasunut inissiisussanngortitsinermik eqqartuussinerup akerlianik paarineqarnissamik eqqartuunneqartut parnaarussivimmiinnissaminnut naleqquttuupput.
Inuit inunnut navianartumik pinerluuteqarsimasut kinguaassiutinullu atatillugu pinerluuteqarsimasut inuit akornanniinnerminni navianaateqartutut nalilerneqartut kisimik paarineqarnissamik eqqartuunneqarsinnaapput.
Pineqaatissinneqartup inissinneqarfiata paarineqartup ukiuni pingasuni paarineqareernerani - ukiumullu ataasiartumik - paarineqarnera ingerlaannassanersoq aalajangiiffigisassallugu pisussaaffigaa.
