Angut hashinik pladinik marlunnik nassataminiittuuteqartoq Nuup mittarfiani tigusarineqartoq

Angut utoqqaanerusoq Nuummi mittarfimmi akitsuuserisunit tallimanngornermi ualikkut marluk qeqqartoq tigummigallarneqalersoq, Kalaallit Nunaanni Politiit KNR-imut paasissutissiipput.

Angutimmi hashit pladit marluk nassartaminiitsillugit anngiortumik eqquteriaraluarpai.

DR naapertorlugu hashi plade 100 grammip missaanik oqimaassuseqarpoq. Kalaallit Nunaanni Politiilli pladit qanoq angitigineri paasissutissiissutigisinnaanngilaat.

Angut politiit oqarnerat naapertorlugu Nuummut tikikkami tigummigallarneqarpoq, maannalu politeeqarfiliariartorluni.

Kalaallit Nunaanni Politiit tigummigallaaneq pillugu nalunaaqutaq 13:30 ilisimatinneqarput.

Pinerluttukinnerusoq ikiaroornartoqarnerusorli

Siorna 2021-mit pinerluttoqannginnerusimasoq KNR-ip siusinnerusukkut allaaseraa.

Tamannali ikiaroornartumik ilaqartumik inatsisinik unioqqutitsinernut ilaanngilaq.

Politiit ukiumoortumik naatsorsuinerat naapertorlugu 2022-mi inatsisinik unioqqutitsinerit ikiaroornartumut tunngassuteqartut – matumani hashi 129,687 kiilu nalunaarsorneqarsimasut 584-iupput.

Kalaallit Nunaanni Politiit oqarnerat naapertorlugu taakku ukiuni 20-ni nalunaarsorneqarsimasuni amerlanerpaapput.

Haship arsaarinnissutigineqartup annertusiartornera pissutaanersoq paasiuminaatsoq, Kalaallit Nunaanni Politiit pisortaata, Bjørn Tegner Bayip KNR-imut oqaatigaa:

- Ikiaroornartoq arsaarinnissutiginngitsoortagarput qanoq angitiginersoq naluara. Akitsuuserisullu ikiaroornartumik nunatsinnut anngiortumik eqqusseriaraluartunik eqaannerusumik nakkutiginneriaaseqalernitsinnik peqquteqarsoraara, taanna oqarpoq.

Politiit oqarnerat naapertorlugu angut suli tigusarineqaqqavoq politiillu suliaq misissueqqissaarfigaat.

KNR-ip suliaq ingerlaavartumik malinnaaffiginiarsaraa.