Angut 43-nik ukiulik Danmarkimi savimmik kapineqarluni toqutaasoq
![Kalaallit Nunaanni Politiit toqutsinernik suliani sisamani suli misissueqqissaarput.](/sites/default/files/styles/image_934x467/public/article_images/politiafspaerring_foto_rigspolitiet.jpg?itok=swIRLMQJ)
Angut Randersimi inissiami savimmik kapineqarsimasoq, Østjyllandip Politiivi sapaatip akunnerata siuliani kalerrinneqarput.
Politiit ambulancillu angut 43-nik ukiulik inissiami nalasoq nassaaraat, taannalu annaanneqarsinnaanngilaq.
43-nik ukiullip saniatigut angutit allat marluk 37-nik 39-nillu ukiullit inissiamiipput, taakku tigusarineqarput inuartutullu pasineqarlutik.
Østjyllandip Politiivi tusagassiuutinut nalunaarummi allapput.
Angut 43-nik ukiulik toqutaasoq kalaaliusoq taassumalu ilaqutai ilisimatinneqartut Østjyllandip Politiivi KNR-imut mailikkut allapput. Politiit suliamut tunngatillugu annerusumik oqaaseqarusunngillat.
Angutit marluk inatsit tunngaviusoq naapertorlugu killisiorneqarnerat naammassivoq. Angutillu tamarmik decembarip ulluisa 22-ata tungaanut parnaarunneqartut, Østjyllandip Politiivi allapput.
- Inissiami susoqarsimanersoq kinalu savilersortuusimanersoq suli erseqqinngilaq. Maanna killisiueqqissaagut arlalinnillu misissueqqilluta pisumik nassuiaateqassalluta.
- Angut 43-nik ukiulik ilisarisimasani marluk peqatigalugit inissiamiissimasoq nalunngilarput, misissuinittalu aallartinnerani inunnik allanik inissiamiittoqarsimaneranut takussutissaqanngilaq, vicepolitiinspektør Lennart Glerup tusagassiuutinut nalunaarummi allappoq.