Tigumminninnissamut pineqaatissiineq pineqaatissiisarnermi sakkortunerpaat ilagaat, unnerluussisussaatitaasullu angutip iliuuserisimasaata annertussusaat inatsisinillu unioqqutitsinerisa ilungersunarneri pissutigalugit tigumminninnissaq piumasaqaatigaat.

Angut 28-nik ukiulik killiligaanngitsumik tigummineqartussanngortoq

Angut ukiukitsumik qasseeriarluni pinngitsaaliisimasutut taassumalu ilaqutaanut toqutsinissamik siorasaaruteqarsimasutut ilaatigut eqqartuunneqarpoq.

Angut ukiukitsumik pinngitsaaliisimasutut, qasseeriarluni nakuusersimasutut, siorasaarisimasutut hashimillu tigummiarsimasutut Eqqartuussiveqarfik Sermersuumi sapaatip-akunnerata siuliani eqqartuunneqarpoq.

Angut pissutsinik 23-ni unnerluutigineqarpoq, taakkunanilu amerlanerpaani pisuutinneqarluni eqqartuunneqarpoq. Pissutsinili tallimani – matumani ukiukitsumik kinguaassiutitigut atoqateqarsimasutut, nakuusersimasutut hashimillu tigummiarsimasutut pinngitsuutinneqarpoq.

Unnerluutigineqartuni sakkortunerpaani angutip niviarsiaqqamik ukiukitsumik qaammatini qulini tassa 2016-imi novembarimit 2017-imi septembarimut pinngitsaaliisarsimaneragaanerani pisuusutut eqqartuunneqarpoq. Angut niviarsiaqqamut taassumalu ilaqutaanut toqutsinissamik siorasaarisarsimavoq aammattaaq niviarsiaqqap niaquanik akitsimik assersuilluni niviarsiaqqap qasseeriarluni ilisimajunnaarneranik kinguneqartuni pisuutinneqarpoq.

Angut – pineqaatissinneqarsimasunut inissiisarfimmi – killiligaanngitsumik – maanna tigummineqartussanngorpoq.

Tigumminninnissamut pineqaatissiineq pineqaatissiisarnermi sakkortunerpaat ilagaat, unnerluussisussaatitaasullu angutip iliuuserisimasaata annertussusaat inatsisinillu unioqqutitsinerisa ilungersunarneri pissutigalugit tigumminninnissaq piumasaqaatigaat.

AAMMA ATUARUK Unnerluussut: Angut niviarsiaqqamut ukiukitsumut pinngitsaaliisarsimaneragaasoq

Eqqartuussivimmi suliami unnerluussisussaatiaasup, Emil Maegaard-Hoffmannip eqqartuussiviup aalajangernera ilorrisimaarutigaa:

- Suliaq annertoqaaq, unnerluutigineqartoq niviarsiaqqamik 16-inik ukiulimmik pinngitsaaliilluni atoqateqarsimasutut, meeqqanik pornolianik siammarterisutut, sakkortuumik sakuusertutut, inuunermut sioranartumik inunnut assigiinngitsunut siorasaarisutut, sakkortuumillu pinerluuteqarnerni allanik unnerluutigineqarpoq. Taamaammat pinerluuteqarfigineqartorpassuit sinnerlugit eqqartuussiviup unnerluussutit maanna aalajangiiffigimmagit suliallu matussuserallarmagit nuannaarutigaara, unnerluussisussaatitaasoq, Emil Maegaard-Hoffmann KNR-imut oqarpoq.

- Tamatuma saniatigut eqqartuussiviup killiligaanngitsumik tigummineqartussanngortitsisoqarnissaanut piumasaqaatinnik malitsinera soorunami aamma ilorrimaarutigaara, unnerluusisussaatitaasoq oqarpoq.

Unnerluutigineqartup eqqartuunneqarnini ingerlateqqitassanngortippaa, suliarlu Nunatta Eqqartuussisuuneqarfianit maanna suliarineqaqqittussanngorpoq.

Unnerluutigineqartoq tamatuma tungaanut Nuummi pineqaatissinneqarsimasunut inissiisarfimmiissaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat