Martin Møller - Angusaqarluarneruniaraluarpunga
Apuuttunili kingullersaajugaluarluni angusani iluaraa.
- Soorunami angusaqarluarneruniaraluarpunga. Ullormili tassani timiga unammisinnaassuseqarpallaanngippat, taava tassa taamaattariaqassaaq. Pakatseqqajunnaareerpunga, Martin Møller Danmarks Radiomut oqarpoq.
Sukkaniunnermi siulliusunit kaajallannermik ataatsimik unamminerup naalernerani qaangerneqangajakkaluarpoq, taamaattoqarsimasuuppallu unammiunnaarsinneqarsimassagaluarluni.
- Siulliusut sukkasuumik aggerput, anguneqarusunngikkumalu tamaviaartariaqarlunga. Unamminermik naammassinninnisaq ilungersuutigaara, Martin Møller ullumi unamminerup nunarsuarmi unammiuaaqataasarnermini kingulliunissaanik naatsorsuutigisaqartoq taama oqarpoq.
- Kilometerit kingulliit arfineq-pingasut qulillu akornannut pigama eqqarsarpunga: wow, maanna naggammik unammeqataavunga, taava maannakkut qasussalluni ajunngilaq, 37-nik ukiulik sisorartartoq Nuummeersoq ukiuunerani OL-p ulluani kingullermi taama oqarpoq.
Finlandimiu Iivo Niskanen unamminermi ajugaavoq. 2 tiimit, 22 minuttit sekuntillu arfineq-pingasut ujakkaareerluni apuuppoq. Sølvinnattoq bronzennattorlu qatanngutigiiupput ruslandimeersut.