Martin Møller - Angusaqarluarneruniaraluarpunga

Nunatsinneersup Martin Møllerip OL-imi 50 kilometerinik ujakkaarluni ullumi unamminermi siulliit 50-it akornanni apuunnissani unamminnginnermini neriutigaa. Normu 60-iullunili apuuppoq, taamaalillunilu timersuutigisami qasunaqisumi apuuttuni unamminermi kingullersaajulluni apuulluni.
Assi © : Bent Hjarbo/Danmarks Skiforbund
Allattoq Karsten Sommer
februaarip 24-at 2018 12:38
Nutserisoq Ivik Kristiansen

Apuuttunili kingullersaajugaluarluni angusani iluaraa.

- Soorunami angusaqarluarneruniaraluarpunga. Ullormili tassani timiga unammisinnaassuseqarpallaanngippat, taava tassa taamaattariaqassaaq. Pakatseqqajunnaareerpunga, Martin Møller Danmarks Radiomut oqarpoq.

Sukkaniunnermi siulliusunit kaajallannermik ataatsimik unamminerup naalernerani qaangerneqangajakkaluarpoq, taamaattoqarsimasuuppallu unammiunnaarsinneqarsimassagaluarluni.

- Siulliusut sukkasuumik aggerput, anguneqarusunngikkumalu tamaviaartariaqarlunga. Unamminermik naammassinninnisaq ilungersuutigaara, Martin Møller ullumi unamminerup nunarsuarmi unammiuaaqataasarnermini kingulliunissaanik naatsorsuutigisaqartoq taama oqarpoq.

- Kilometerit kingulliit arfineq-pingasut qulillu akornannut pigama eqqarsarpunga: wow, maanna naggammik unammeqataavunga, taava maannakkut qasussalluni ajunngilaq, 37-nik ukiulik sisorartartoq Nuummeersoq ukiuunerani OL-p ulluani kingullermi taama oqarpoq.

Finlandimiu Iivo Niskanen unamminermi ajugaavoq. 2 tiimit, 22 minuttit sekuntillu arfineq-pingasut ujakkaareerluni apuuppoq. Sølvinnattoq bronzennattorlu qatanngutigiiupput ruslandimeersut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq