Angertut qulit naaggaartullu arfineq pingasut: Jens Immanuelsen tatigiunnaarneqarnissaq anigorpaa

Aalisarnermut, piniarnermut nunalerinermullu naalakkersuisoq Jens Immanuelsen (S) tatigiunnarneqarnissamut pingasunngornermi nalunaaqutaq arfineq marlunut anigueqqavippoq.

Inatsisartunut ilasortat 19-it taasisinnaapput - taakkunannga qulit tatiginnikkunaarnissamut naaggaarput. Arfineq pingasut angerput, ataaserlu taaseqataanngilaq. Kingulleq tassaavoq aalisarneq, piniarneq nunalerinerlu pillugit ataatsimiititaliami siulittaasoq, Henrik Fleischer. 

Illua tungiliuttut tamarmik tatiginnikkunaarnissamut angertuupput.

- Siumup, Demokraatit Nunatta Qitornaasalu aalisarnermut, piniarnermut nunalerinermullu naalakkersuisoq ataatsimiititaliamik suleqatiginnilluaqqullugu sakkortuumik piumaffigaat isornartorsiutigineqartullu maniguulluni aaqqittariaqarai sakkortuumik piumaffigaat. Inatsisartut siulittaasuata Vivian Motzfeldt-ip pinngitsoortitsiniarluni taasissutissaq taamaattoq taasinngitsiarnermi atuarpaa.

AAMMA ATUARUK Partii Naleraq Jens Immanuelsenimut tatiginnikkunnaartoq

Taasineq piniarneq aallaaniarnerlu pillugit inatsisissatut nutaatut siunnersuut pillugu oqallinnermut nalunaaquttap akunnerinik arlalinnik sivisussuseqartumut naggasiutaavoq. Oqallinnerli piniarnermut aallaaniarnermullu tunnganngilluinnartunik imaqaqaaq.

Partii Naleqqap siulittaasua, Hans Enoksen, oqaluttarfimmut qaqivoq, ataatsimiititaliarlu Jens Immanuelsenimit inatsisissatut siunnersuummik sulinermi siorasaarneqarsimasoq oqarluni.

Siorasaarutit sumorpiaq tunngasuunersut, oqallinnermi paasinarsinngilaq, kisianni Aalisarnermut ataatsimiititaliap siulittaasuata tulliata, IA-meersup Aqqaluaq B. Egedep, Hans Enoksen oqaluttarfimmiit taperserpaa. 

- Siulittaasoqarfimmut siorasaarineq pillugu saaffiginninniarta. tunuarsimaassanngilagut, taanna oqaluttarfimmiit oqarpoq.

Jens Immanuelsen imminut tatiginnikkunnaartoqassanersoq pillugu oqallinnermut akuunngilaq.

Inatsisissatut siunnersuut itigartinniaraa

Pisoq tamarmi inatsimmut nutaamut Naalakkersuisut paasiuminartunngortillugulu ullutsinnut tulluartunngortinniagaannut tunngavoq.

Inatsisissatulli siunnersuutip Inatsisartuni oqallisigineqalermat akerleriissutigineqarnera annertungaarmat ataatsimiititaliap inatsisissatut siunnersuut itigartinniarpaa. Taamaattoqanngilarli - Hans Enoksenili Jens Immanuelsenimut tatiginnikkunnaarnerarpoq.

Naalakkersuisut inatsisikkut uumasunut ajornartorsiutaasunut, soorlu nannunut, inunnut uumasuutinullu uilorianartorsiortitsisinnaasunut iliuseqarbiarnermut atugassanik malittarisassiorsinnaangortussaagaluarput, taavalu inatsisaattuliorluni piniarnissamut nakkutiginninnermik sukaterisinnaalissallutik, inatsisattuliorlutillu piniartunut iliuuseqarsinaassallutik.

Inatsit unioqqutitsilluni piniarnermut nakkutilliinermut unioqqutitsilluni piniartunut kinguneritinneqartitsisarnernut aamma sukaterisussaavoq.

Piniarneq uumasunik ilisimasallit innersuussutai aallaavigalugit ingerlanneqartassasoq inatsimmut nutaamut aamma siunnersuutigineqarpoq. Piniartulli isumaat taamatulli pingaruteqartigissasoq Aalisarnermut, piniarnermut nunalerinermullu ataatsimiititaliaq isumaqarpoq.

Angallat inuup alla unioqqutitsilluni piniarluni atorsimappagu, angallammik piginnittoq angallamminik arsaagaasinnaaneranik siunnersuut, ataatsimiititaliap aamma peeqquaa.