Partii Naleraq Jens Immanuelsenimut tatiginnikkunnaartoq

Partii Naleqqap siulittaasua Hans Enoksen aalisarnermut piniarnermullu naalakkersuisumut tatiginnikkunnaarluni oqarpoq.

Piniarnermut aallaaniarnermullu inatsisissatut siunnersuut inatsisartunit aappassaaneerneqarluni oqallisigineqarmat inersuarmi sakkortuumik akerleriittoqangaatsiarpoq.

Jens Immanuelsenip piniarneq aallaaniarnerlu pillugu inatsisissatut siunnersuutaata oqaluuserineqarnerani, pisussaaffimminik naammassinnissimannginneragaavoq.

Aalisarnermut, piniarnermut nunalerinermullu ataatsimiititaliaq naapertorlugu Jens Immanuelsenip piniarnermut siunnersuisoqatigiit innersuussutaasa inatsisissatut siunnersuummik suliaqarnermi ilanngutinnissaat pillugu ataatsimiititaliamut neriorsuutini eqquutsissimanngilaa.

Hans Enoksenip naalakkersuisunut ilaasortat akisussaanerat pillugu inatsimmut innersuussivoq.

Naalakkersuisunut ilaasortat naalakkersuisutut pisussaassusiminnik naammassinninngippata pineqaatissinneqarsinnaassasut inatsimmi allaqqavoq.

Aamma Aqqaluaq B. Egedep Inuit Ataqatigiinneersup Jens Immanuelsen pisussaaffimminik naammassinninngissimanerarpaa. Taassuma Jens Immanuelsen ataatsimiititaliap suliaanut ataqqinninnermik takutitsinnginnerarpaa.

Inatsisissatut siunnersuut itigartinniaraa

Pisoq tamarmi inatsimmut nutaamut Naalakkersuisut paasiuminartunngortillugulu ullutsinnut tulluartunngortinniagaannut tunngavoq.

Inatsisissatulli siunnersuutip Inatsisartuni oqallisigineqalermat akerleriissutigineqarnera annertungaarmat ataatsimiititaliap inatsisissatut siunnersuut itigartinniarpaa. Taamaattoqanngilarli - Hans Enoksenili Jens Immanuelsenimut tatiginnikkunnaarnerarpoq.

Naalakkersuisut inatsisikkut uumasunut ajornartorsiutaasunut, soorlu nannunut, inunnut uumasuutinullu uilorianartorsiortitsisinnaasunut iliuseqarbiarnermut atugassanik malittarisassiorsinnaangortussaagaluarput, taavalu inatsisaattuliorluni piniarnissamut nakkutiginninnermik sukaterisinnaalissallutik, inatsisattuliorlutillu piniartunut iliuuseqarsinaassallutik.

AAMMA ATUARUK Tatiginnikkunnartoqarneranit ullut marluk kingorna: Aalisarnermut ataatsimiititaliaq nipaatsupilussuaq

Inatsit unioqqutitsilluni piniarnermut nakkutilliinermut unioqqutitsilluni piniartunut kinguneritinneqartitsisarnernut aamma sukaterisussaavoq.

Piniarneq uumasunik ilisimasallit innersuussutai aallaavigalugit ingerlanneqartassasoq inatsimmut nutaamut aamma siunnersuutigineqarpoq. Piniartulli isumaat taamatulli pingaruteqartigissasoq Aalisarnermut, piniarnermut nunalerinermullu ataatsimiititaliaq isumaqarpoq.

Ukioq manna tatiginninnginnerup aappassaa

Angallat inuup alla unioqqutitsilluni piniarluni atorsimappagu, angallammik piginnittoq angallamminik arsaagaasinnaaneranik siunnersuut, ataatsimiititaliap aamma peeqquaa.

Jens Immanuelsenimut ukioq manna aappassaanik tatiginnikkunnaartoqarpoq. Siullermik Aalisarnermut ataatsimiititaliap "aalisarnermut inatsisip nutaap suliarineqarnerani naalakkersuisumit matoqqavallaartoqarnera" kamaatigaa.

Taama oqariartortoqarnera Jens Immanuelsenip akuerinngilaa. Aalisarnermut ataatsimiititaliap siulittaasua, Jens Immanuelsenillu parteeqataa Henrik Fleischer tamanatuma kingorna Siumumi ilaasortat sinneranit kingorna isornartorsiorneqalerpoq.