Ilisimatooq: Angerlarsimaffeqanngitsut assigiinngitsuupput

- Angerlarsimaffeqanngitsut assigiiaartumik sullinneqartarnerat unammillernartuuvoq, Ilisimatusarfimmi ilisimatooq angerlarsimaffeqanngitsullu pillugit immikkut ilisimatusartoq Steven Arnfjord oqarpoq.

Taassuma Inuit Ataqatigiit angerlarsimaffeqanngitsut angerlarsimaffigigallarsinnaasaannik 100-nik sanaartornissamik siunnersuutaannut isumaqataanini oqaatigaa.

Angerlarsimaffeqanngitsulli minnerpaamik immikkoortunut sisamanut immikkoortinneqartariaqarmata, ilisimatuup eqqumaffigeqquaa: Inuusuttut 35-t tungaannut ukiullit, angutit 35-t sinnerlugit ukiullit imigassamik atornerluisut, arnat ataatsimut taavalu angutit utoqqaat immikkut.

Aamma atuaruk Angerlarsimaffeqanngitsut hunnorujulikkaat

Inuusuttullu angerlarsimaffeqanngitsut ikioruminarnerpaasut, Steven Arnfjordip erseqqissaatigaa.

- Inuusuttuupput sulileqqinnissamut aqqutissiuunneqarlutillu ikorfartorneqartussat. Aalajangersimanerusumik sinaakkusersugassaapput, tapersersorneqartariaqarlutik imminnullu tatiginerulertariaqarlutik. Taakku angusaqarsinnaasut, isumaqarpunga. Inuusuttut taakku Frelsens Hærimi iggavitsinnilu naapittarpagut.

Taava aamma imerajuttunik anguteqartoq, Steven Arnfjord nangippoq.

- Taakkua Angerlarsimaffeqalertariaqarlutillu katsorsarneqartariaqarput.

Arnalli immikkut pisariaqartitsipput.

- Taakkua annertunerusumik ilisimasaqarfiginngilagut. Angutinut sanilliullugit allaanerusumik angerlarsimaffissaaleqipput. Taakkua isumaginninnikkut katsorsarneqarnissakkullu neqeroorutinik taakkununngarpiaq saaffiginnittunik amigaateqarput.

Aamma atuaruk Kofoeds Skole ammaanersiorneqartoq

Utoqqaallu kiffaanngissuseqarnerullutik angerlarsimaffimmik ataatsimoorfimmik pisariaqartitsinerupput.

- Immiaarartorsinnaallutik pujortarsinnaatitaallutillu. Utoqqaat illuanni akueriumasanit annerusumik  kiffaanngissuseqarsinnaallutik, Steven Arnfjord oqarpoq.