Kofoeds Skole ammaanersiorneqartoq
Kofoeds Skole Danmarkimi Københavnimi, Aarhusimi Aalborgimilu immikkoortortaqarfeqarpoq. Atuarfik ukiuni kingullerni 20-ni Europap qeqqani kangianilu illoqarfinni arfineq-pingasuni atuarfinnik taama ittunik 20-nit amerlanerusunik pilersitseqataasimavoq.
- Atuarfiup pilersinneqarneratigut ilisimasavut misilittakkavullu atorlugit ikuisinnaassalluta neriuutigaarput, taamaaliornikkullu Kalaallit Nunaanni innuttaasunik ikiortarialinnik ikiuisussamik Kofoeds Skolemik ineriartortitseqataalluni, Danmarkimi Kofoeds Skolep pisortaa, Robert Olsen, tusagassiorfinnut nalunaaruteqarluni taama allappoq.
Nunatsinni Kofoeds Skolemik pilersitsineq aningaasaateqarfinnit arlalinnit aningaasalersorneqarpoq. Tassaapput OAK Foundation Danmark, Villumip Aningaasaateqarfia aamma A.P. Møllerip nuliatalu Chastines Mc-Kinney Møllerip Aningaasaateqarfiat. Atuarfik ukiuni siullerni pingasuni sullissivittut imminut pigisutut pilersikkiartuaarneqassaaq, pisortanit ingerlatsineq pillugu isumaqatigiissuteqarluni ingerlanneqassalluni.
