Angerlarsimaffeqanngitsut pillugit ataatsimeersuartitsisoqarmat angerlarsimaffeqanngitsut peqataatinneqannginnerat, angerlarsimaffeqanngitsup, Hans-Peter Ananiassenip eqqarsarnartoqartippaa.Assi: KNR

Angerlarsimaffeqanngitsoq: Ataatsimeersuarnermi ilaatinneqannginnerput eqqarsarnarpoq

Angerlarsimaffeqanngitsut pillugit ataatsimeersuarneq Hans-Peter Ananiassenimit nuannaarutigineqarpoq, taamaattoq angerlarsimaffeqanngitsut peqataannginnerat eqqarsarnartoqartippaa.

Nuummi pingasunngornermi 15-it tikillugit issittoq angerlarsimaffeqanngitsoq, Hans-Peter Ananiassen Brugsenimi silataanilu aviiseerniarpoq.

Aviiseerniartup akinnguani Hotel Hans Egedemi nunatsinni angerlarsimaffeqanngitsut pillugit pingasunngornermi ataatsimeersuartoqarpoq, angerlarsimaffeqanngitsulli ataatsimiinnermi peqataannginnerat eqqarsaammertitsivoq.

- Assut eqqarsarnarpoq, aasimmiaasiit ikkua akisoorsuarmik attartugalerlutik ininik attartugalerlutik angerlarsimaffeqanngitsut pillugit eqqartuipput, angerlarsimaffeqanngitsoq, Hans-Peter Ananiassen oqarpoq.

Hans-Peter Ananiassen 2009-mili angerlarsimaffeeruppoq, Nuummilu ulloq manna tikillugu angerlarsimaffeqanngitsut inaani najugaqarluni.

Qulaajaasoqartoq
Nuummi ataatsimeersuarnermi angerlarsimaffeqannginnerup annertussusaa qulaajarneqarpoq angerlarsimaffeqannginnermullu pissutaasartut misissorneqassallutik. Ukiormannalu qulaajaanerup naammassineqarnissaa naatsorsuutigineqartoq, Isumaginninnermut Naalakkersuisup ataatsimeersuarnermi qaaqqusisuusup tusagassiuutitigut nalunaarutigaa.

Ataatsimeersuartoqarneranili angerlarsimaffeqanngitsut peqataannginnerat, Hans-Peter Ananiassenip isoraa.

- Angerlarsimaffeqanngitsut pillugit ataatsimeersuartoqarpat angerlarsimaffeqanngitsut peqataatissallugit soorunami pissusissamisooraluarpoq, maani illoqarfiup qeqqani aqqusinermut pigutta takusinnaavagut angerlarsimaffeqanngitsut sumi tamaniittut, taamaattumik angusassaq ajunnginnerpaaq anguneqassappat angerlarsimaffeqanngitsut akuutinneqartariaqaraluarput, Hans Peter Ananiassen oqarpoq.

Angerlarsimaffeqanngitsuuneq nalaanneqartillugu inuunermi puigugassaanngisaannarlunilu sullissineq kigaassinnaasartoq angerlarsimaffeqanngitsut ilaasa misigisarpaat. Taamaattumik Hans Peter Ananiassen ataatsimeersuarsimasunut kaammattuutissaqarpoq:

- Kaammattarusussinnaavakka, nunamut kiisami tummarlutik angerlarsimaffeqanngitsuleriniarlik - angerlarsimaffeqanngitsut peqataatillugit, ulluinnarluni angerlarsimaffeqanngitsunut sullissisut peqatigalugit angerlarsimaffeqannginneq pillugu eqqartuiniarlik, maannammut ukiut aqqanillit tikillugit angerlarsimaffeqanngitsoq, Hans-Peter Ananiassen oqarpoq.

Angerlarsimaffeqanngitsunut aaqqissuisoqassasoq
Angerlarsimaffeqanngitsut pillugit sulialinnut tassa atorfilittanut, politikerinut suliamullu attuumassuteqartunut toraagaqarluni ataatsimeersuartitsinerusoq, kingusinnerusukkullu angerlarsimaffeqanngitsunut isumaginninnikkullu ajornartorsiuteqartunut ukiormanna aaqqissuisoqassasoq, Isumaginninnermut Naalakkersuisoqarfimmi, immikkoortortami pisortaq, Kirsten Olesen KNR-imut ilisimatitsivoq.

Angerlarsimaffiqanngitsuuneq siumut sammisumik sulinissaq pillugu Isumaginninnermut Naalakkersuisoq Martha Abelsen tusagassiortunik sisamanngornermi, februaarip ulluisa 27-anni nalunaaqutaq ataatsimut katersuutitsissaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat