Nuuk Water Taxi aporneq pillugu: Angallat kinguporsorsinnaasimanngilaq

Angallat Nuummi umiarsualivimmut aporsimasoq KNR-ip marlunngornermi ualikkut allaaseraa.

Angallat Aviaq Ittuk Nuuk Water Taximit pisiarineqaqqammerluinnartoq, umiarsualivimmut aporpoq.

Nuuk Water Taximi pisortap, Anders Lukke Laursenip oqarnera naapertorlugu angallat talittarfigisaminit nuutsinneqaannartussaalluni aporpoq.

- Koblingia atorsinnaajunnaarsimalluni kinguporsorsinnaasimanngilaq, taamaammat nunamut apunngitsoorsinnaasimanani – qujanartumilli arriitsumik ingerlavoq. Pissanganartorsiorfiuvallaanngilaq. Angallat ningulluarlunilu suikkaavoq, pisortaq KNR-imut allakkamik akissuteqarpoq.

Aviaq Ittuk suliffeqarfimmit Masimmik kalinneqapallappoq, talittarfimmukarfigisaminiilerlunilu.

- Koblingia maanna taarsissavarput angallallu pilersaarutaasutulli amutsiviliaanneqarluni, Anders Lykke Laursen oqarpoq.

Kalaallit Nunaanni Politiit pisoq uppernarsarpaat, inunnillu ajoqusertoqannginnerarlugu, suliamilli suli misissuigamik suli annerusumik oqaaseqarsinnaanngillat.

Aviaq Ittuk umiarsualivimmut apunnginnermini umiatsiaq minnerusoq aamma aporaa videoliaq Facebookikkut ingerlaartinneqarsimavoq.