Angallat Nuummi nunamut aportoq
Angallat Aviaq Ittuk Nuummi nunamut marlunngornermi aporpoq.
Inunnik ajoqusertoqarsimaneranik Kalaallit Nunaanni Politiit paasissutissiinngillat.
Allattoq Hanna Vestergaard Hviid
oktobarip 24-at 2023 16:37
Angallat marlunngornermi ualikkut Nuummi nunamut aporpoq.
Kalaallit Nunaanni Politiini pigaartoq, Jørgen Madsen KNR-imut uppernarsaavoq.
Taassuma politiit sumiiffimmukartitsisimasut inunnillu ajoqusertoqarneranik nalunaaruteqartoqanngitsoq oqaatigaa.
Jørgen Madsenip oqarnera naapertorlugu angallat Aviaq Ittuk nunamut aportuuvoq. Sermitsiaq.AG-mili ullumi atuarneqarsinnaavoq Nuuk Water Taxi umiarsuarmik pineqartumik Disko Linemit pisiarinneqammersoq.
KNR-ip Nuuk Water Taxi oqaaseqartinniarsaraa.
Politiit suliamik suli misissueqqissaarmata Jørgen Madsen annerusumik oqaaseqarsinnaanngilaq.
