Angallannermut Naalakkersuisoq: Narsarsuup mittarfia matuneqassaaq imaluunniit atorneqarnera annikilisassaaq

Narsarsuarmi mittarfiup matuneqarnissaanik imaluunniit atorneqarnerata annikillisarnissaanik Naalakkersuisut maanna pilersaaruteqalerput. Siunissami angallannermut pilersaarutaasut angallannermut Naalakkersuisup Knud Kristiansenip ippassaq Naalakkersuisut sinnerlugit saqqummiukkamigit taama oqaluttuarai.

Allattoq Jaaku Lyberth, Nauja Møller

apriilip 23-at 2015 16:11

- Qaqortup aammalu Narsap akornanni, atlantikup avannaani mittarfiliortoqarnissaa, tamatumalu peqatigisaanik Narsarsuarmi mittarfiup matuneqarnissaa imaluunniit atorneqarnerata annikillisarnissaa, Angallannermut Naalakkersuisoq Knud Kristiansen siunissami angallannermut pilersaarutaasut saqqummiukkamigit taama oqarpoq.

Taamatullu oqarnera Naalakkersuisooqatigiit Narsarsuaq pillugu siunissamut eqqarsaatigalugu oqaatigisarsimasaannik mumisitsivoq. Qaqortullu ilinniartoqarfissuunera naalakkersuisup pilersaarutiminut tunngavilersuutaasa ilagaat.

- Tassa uani pingaaruteqarpoq, takornariaqarneq eqqarsaatigigaanni Kujataa eqqarsaatigigutsigu eqaallisaanissaq.

Aamma atuaruk Naalakkersuisoq: Kangerlussuaq matuneqarnavianngilaq

- Aamma soorunami Qaqortoq ilinniartoqarfissuuvoq, aamma taamaammat pingaaruteqarpoq A-mingaanniit B-mut angallassinissaq uani anguniarneqarmat, Knud Kristiansen oqarpoq.

Pilersaarutit Naalakkersuisunit saqqummiunneqartut nutaarluinnaapput. Tassami januaarip 22-ani isuma allaalluinnarmat. Taamanimi Naalakkersuisut Narsarsuup matunissaanut pilersaaruteqannginnerat aalajangiusimavaa.

- Narsarsuarmut tunngatillugu matuneqarnissaanik pilersaaruteqanngilagut, kisianni ineriartortinnissaanut pilersaaruteqarpugut, Angallannermut Naalakkersuisoq Knud Kristiansen Qanoruumut januaarip 22-ani taama oqarpoq.

Aamma atuaruk Qaqortumi mittarfiliornissaq pillugu nalunaarusiaq isumallualersitsinngilaq

Knud Kristiansenip tusagassiortunut marlunngormat saqqummiussinermini oqaaserisai pillugit itisiliitinniaraluaratsigu iluatsinngilarput. Taanna Inatsisartut Naalakkersuisullu siunissami angallanneq pillugu isumasioqatigiinneranni aqagu tallimanngornermi saqqummiussissaaq, tamatuma kingorna oqaaseqassalluni KNR-imut neriorsuivoq.

Nutaarsiassami kukkunermik nassaarsimaguit uunga allaffigineqarsinnaavugut.