Naalakkersuisoq: Kangerlussuaq matuneqarnavianngilaq
Angallannermut naalakkersuisup Knud Kristiansenip (A) Kangerlussuarmiut eqqissisarpai Kangerlussuullu mittarfia matuneqartussatut pilersaarutigineqanngitsoq aammalu tamanna Naalakkersuisuni eqqartorneqarsimanngitsoq erseqqissaatigalugu. Paarlattuanilli Kangerlussuup ineriartorteqqinneqarnissaanik pilersaaruteqarlutik oqaatigaa.
Naalakkersuisooqatigiinnissamik isumaqatigiissummi allaqqavoq kommunit suleqatigilluinnarlugit tamakku ingerlanneqassapput.
Angallannermut naalakkersuisup Qanoruumi apersorneqarnera uani isiginnaarsinnaavat
- Kangerlussuup mittarfia matuneqarnianngilaq aamma Naalakkersuisut pilersaarutigaarput kommunit maanna naapeqattaarlugit aallartilerpagut. Ilaatigut Qeqqata Kommunia aamma oqaloqatigissavara, aamma Kangerlussuaq eqqarsaatigalugu.
Kangerlussuarmiut ernumassutissaqanngillat
- Kisianni Kangerlussuarmiut ernumassutissaqanngillat, namminersortut ingerlarsorniarlik. Takornariaqarnikkut umiarsualiveqarnikkullu inerisaaqqinniarpugut, taavalu aamma nunap pissarititaanik anguniagarnitsinni Naalakkersuisut Kangerlussuaq aamma aallaavigivarput, Angallannermut naalakkersuisoq, Knud Kristiansen, KNR-imut taama oqarpoq.
AAMMA ATUARUK Nuup mittarfiata pilersaarutigineqarnera Kangerlussuarmiut ernumanartoqartikkaat
Qaqortumi, Tasiilami mittarfiliornissamik aamma Nuummi Ilulissani mittarfiit 1199 meterinut tallilerneqarnissaannut tunngatillugu suliat aallartinneqareersimapput, naalakkersuisullu ukiaru saqqummiussaqarsinnaanini neriuutigaa.
- Suliat taakku aallartipput, aamma Kangerlussuarmut tunngasut. Aamma Narsarsuarmut tunngatillugu, mittarfiup matuneqarnissaanik takorluugaqanngilagut kisiannili ineriartortitsinissamut pilersaaruteqarluta.
- Kangerlussuup mittarfia matuneqassanngilaq. Taamatut pilersaaruteqanngilagut, kisianni annertunerusumik takornariaqarnikkut allatigullu takorluugaqarpugut, tassanilu Kangerlussuaq aamma annertuumik inissisimasussaavoq, Angallannermut naalakkersuisoq taama oqarpoq.
