VIDEO Nuup mittarfiata pilersaarutigineqarnera Kangerlussuarmiut ernumanartoqartikkaat

- Maanimiut allat assingalugit soorunami siunissaq ernumanartoqartippara, Knud Rasmussen KNR-imut oqarpoq.

Nunaqarfimmi aqutsisut siulittaasuata Knud Olsenip Air Greenland timmisartortitseqatigiillu allat Kangerlussuakkoortarunnaassappata tamanna nunaqarfimmi annertuumik suliffissaaleqisoqalerneranik kinguneqassanasoraa.

- Mittarfeqarfiit suliffippassuarnik pilersitsisimapput. Suliffeqarfillu taanna matussappat namminersorlutik ingerlatsisut annertuumik eqqugaassapput. Inuppassuit suliffissaarutissapput, Knud Olsen oqarpoq.

Aningaasalersuerusuttoqarnissaa takorlooraa

Knud Rasmussenimik ateqarluni soorunami pinngortitamiinneq nuannarineqanngitsoornavianngilaq, taamaattumilu aamma Kangerlussuaq qimattariaqassaguniuk ajuusaarnassaqisoq oqaatigaa.

- Kangerlussuup nunataa alianaatsupilussuuvoq eqqissisimanartupilussuullunilu. Pinngortitaq alianaatsupilussuuvoq. Taamaammat nuutsitaassagaluarutta tamanna uannut artornassaqaaq, Knud Rasmussen oqarpoq.

Nunaqarfimmili aqutsisut siulittaasuata taama ajortigisumik pisoqarnissaa neriuutiginngilaa.

- Mittarfik matuneqassagaluarpat Nuummullu nuunneqarluni, taava Kangerlussuaq aningaasalersuisartunit nunanit allaneersunit attartorneqarsinnaavoq, taamaaliornikkullu suliffiit maaniittut pigiinnarneqarlutik, Knud Olsen oqarpoq.

Pisiniarfinnut aalajangiisuulluinnassaaq

Kangerlussuarmi pisiniarfiutillit mittarfeqarfiup siunissaa pillugu pilersaarutit aamma ernumanartoqartippaat.

- Ernumanaqaaq. Ingammik nutaamik aallartitsilluni nutaamik inuuneqalernissaq sulissutigalugu, Sam Grønvold oqarpoq.

Taanna nulianilu pisiniarfik Vivips aasaq ammarpaat, mittarfeqarfilli matuneqassappat Kangerlussuarmi pisiniarfiuteqarnissaq akilersinnaajunnaassaaq.

- Sulisut aasaanerani ataatsimik ilanissaat pilersaarutigigaluaratsigu maanna qanoq pisoqassanersoq utaqqimaaqqaartariaqalerparput.

- Umiarsulivittaarnissatsinnik neriorsoreerpaatigut. Aamma Sisimiunut aqqusiniliortoqarnissaa utaqqimaarparput, aqqusiniliortoqarneratigummi maani inuussutissarsiornikkut siuarsaasoqarlunilu pilerinarninngortitsisoqassammat, Sam Grønvold oqarpoq.

Naalakkersuisooqatigiinnissamillu isumaqatigiissut nutaaq tunngavigalugu, ilaqutariit Grønvoldikkut pilersaarutitik tamaasa unikaallatsikkallarpaat, qanorlu pisoqassanersoq pissangallutik utaqqillugu. Mittarfeqarfillu matussagaluarpat pisiniarfiutertik matoriarlugu Danmarkimut nuunniarput.