Angallannermi malittarisassanik unioqqutitsinerpassuit politiit tupaallaatigigaat

Nakkutilliinerni angajoqqaat meeqqamik biilini isumannaatsumik inissiisimanersut pingaarnertut misissuiffigineqarpoq. Misissuinerit marluusut atorfiit paaqqinnittarfiillu nalaanni ingerlanneqarput, misissuinermilu siullermi meeqqanik isumannaallisaaneq pillugu ilitsersuisoqarpoq nakkutilliinerillu aappaanni isumannaallisaanermut piumasaqaataasut malinneqarsimanngippata tamanna kinguneqartinneqarluni.

Angallannermilu malittarisassanik unioqqutitsinerit Nuummi Politiit tupaallaatiginerarpaat.

Nakkutilliinerit aappaanni biilertut 16-it meeqqat isumannaallisarnissaannut atortorissaarutinik eqqortunik atuinnginnertik pissutigalugu akiligassinneqarput. Meeqqamut ataatsimut 500 koruuninik akiligassiisoqarpoq.

- Nuummi Politiit angallannermut allaffeqarfiata angallannermi malittarisassanik unioqqutitsinerpassuit tupaallaatigai, politiimmi tugasassiorfinnut nalunaaruteqarlutik Nuummi nakkutilliisoqarnissaanik nalunaaruteqareersimapput aammalu ilitsersuinermikkut malittarisassanik unioqqutitsinerit erseqqissaatigisimallugit, politiit tusagassiorfinnut nalunaaruteqarlutik taama allapput.

Meeqqanik isumannaallisaanerup saniatigut angallannermi malittarisassanik allanik unioqqutitsisoqarnersoq aamma misissuiffigineqarpoq. Akiligassiissutinillu katillugit 92-inik tunniussisoqarpoq.

Inersimasut 52-it qitequtaasaqarit ingerlaarsimapput, 17-it ingerlatitsisinnaanermut allagartaqaratik qulingiluallu biilimik ingerlatsinerminni oqarasuaammik angallattakkamik atuisimallutik.

Taakkuinnaanngillalli. Aamma biilinik inissiiffigeqqusaanngitsuni inissiisoqartarsimavoq. Billertut aappaluttuusoq ingerlaannartarsimapput. Biilinik isumannaatsuunngitsunik atuisoqarsimavoq. Biilertoq ataaseq ingerlatsisinnaanermut allagartamik nunatsinni atugassamut allanngortitsigani ingerlaarsimavoq. Imigassartorsimatilluni biilimik ajutoortoqarpoq. Angallannermi ajortoortoqarnerani pisussaaffimmik naammassinninngitsoortoqarpoq. Ingerlatsisinnaanermut uppernarsaateqarani biilertoqarluni. Ingerlatsisinnaanermut uppernarsaammik arsaagaasimalluni ingerlatsisoqarpoq kiisalu aamma amerlavallaanik ilaasoqarluni ingerlasoqarsimalluni.

Politiit Nuummik ukiormanna angallattunik nakkutilliinnerit amerlanerusut ingerlanniarlugit pilersaarutigaat.