Angalatitsisut pisortaat: Ingiaqatigiittarnissaq ajorpoq
Umiarsuaatileqatigiiffiilli, takornarianik Nunattta sineriaatigut angallassisartut, ilaat malerugassaq pisariaqanngitsoq isumaqarpoq. Aamma taama piumasaqaatinik sukaterinerup, takornariartitsinermut ajoqutaanissaa aarlerinartoqartippaa sukaterinissarlu pisariaqannginnerarlugu.
Søren Rasmussen Abatros Travelimi umiarsuarmik takornariartaataateqartumi pisortaavoq, takornariartaallu aasaq naallugu Nunatsinnut angalasarpoq.
- Isumannaallisaanerup pitsaassusaa qaffasissorujussuuvoq. Massakkut umiarsuit tamarmik sananeqaataat imaappoq, saneraatigut singaraluaruniluunnit immalluni kiviunnarani. Tamarmillu aamma sukkasuulianik angallatinik annanniutinik pitsassuarnik annanniuteqartarput, taamaammat isumaqarpunga ajutoortoqarnissaa ilimanaateqarpallaanngitsoq. Isumaqarpungalu pinngitsaaliissuteqarniarneq torinngituliornerusoq, Søren Rasmussen taama oqarpoq.
Imarsiornermut Qullersaqarfiup qularnaquteqanngitsumik umiarsuaatileqatigiiffinnut aaqqissuusseqatigiillutik ikioqatigiillutik angalaqatigiittarnissaannut pinngitsoorani pisariaqartinneqarpoq.
- Issittup imartaani ajutoortoqassagaluarpat pisariaqarpoq umiarsuarnik allanik ikiuussinnaasunik sumiiffimmi ajutoorfiusumiittoqarnissaa. Suli erseqqissumik aalajangertoqanngilaq nalunaaquttap akunneri qasserpiaat atorlugit ikiuisussap apuuttarnissaa, oqarsinnaavugut akunnialuit ingerlanerinnaani umiarsuaq ikiuisussaq apuuttariaqassasoq. Taamaaliornikkut inuup inuuneranik annaassisoqarsinnaammat, Per Sønderstrup taama oqarpoq.
Kisiannili Albatros Travelimi isumaqarput isumannaallisaaneq pitsaaqimmat akuerineqartariaqartoq. Naak piumasaqaatit imarisaat suli ilisimanngikkaluarlugu, Visit Greenland assigalugu aarlerissutigaat Nunatsinni takornariaqartitsitsineq ajalusoortinneqassasoq.
- Ingiaqateqarluta Qaanaamut angalasinnaanngilagut. Taamaammat Qaanaaliartitsisarnerput unittariaqassaaq, qanorluunniillu oqaraluaraanni takornariartaatinut ilaalluni takornariaqarneq tammariartuaassaaq. Albatros Travelip angalatitsisarnera matumani pineqanngilaq, angalatitsisartullu annerit matumani pineqarlutik. Takornariartaatit Nuummukartartut imaluunniit Nuummiit kujammut angalasartut Nunatsinnukartarnertik unitsissavaat. Unammillertitik sianerfiginavianngilaat aperalugillu angalaqaataajumanersut, pisariuallaassaqaaq, Søren Rasmussen Albatros Travelimeersoq oqarpoq.
Imarsiornermut Qullersaqarfimmit naqissuserneqarpoq, umiarsuaatileqatigiiffinnit sinniisut ataatsimeeqatigineqartut. Inatsissanillu suliaqarnermi IMO-mi ataatsimiinnermi oqalliseqataassasut.
Kalaallit Nunaata imartaani Issittullu sinneranut atatillugu inatsisinik ukiut marluk ingerlaneranni akuersisoqarnissaa ilimagineqarpoq.