VIDEO Angalatitsineq kalaallinut misigisaqarfiusoq

Pinngortitamik illersuiniaqatigiiffiup WWF-ip issittumi inuusuttunik paasisassarsiortitsilluni ukiormanna angalatitsinera "Students on Ice", kalaallisut "Ilinniartut Sikumi"-mik taaguuserneqartumi, kalaallit peqataasut tupaallatsitaapput, Canadamiit ministeriunermit alakkarneqaramik.

Naggueqatigiit inuit, eqqumiitsuliortut, utoqqasaat sulisullu 200-t sinnillik ilisimatuut umiarsuaanni peqataapput. Ilinniartut nunanit tamalaaneersut 120-iupput, kalaallit inuusuttuaqqat pingasut aamma peqataallutik.

Ilisimasassarsiorneq Iqalunni aallartippoq Hernhutillu nunaqarfianni Hebronimi Labradorimiittumi nanginneqarluni. Taava nunatsinnut ikaassapput, Ilulissallu sisimiullu kujataani Itilleq tikinneqassallutik. Angalasut Kangerlussuarmut killissapput.

Aamma atuaruk Inuusuttuaraq issittumi ilisimasassarsioqataalertoq

Inuusuttut issittumi pinngortitap tamatumalu inuisa qanoq innerannik paasisaqarnissaat ilisimasassarsiornerup siunertaraa. Silap pissusiata allanngoriartornera Inuillu ilisimasatoqaat aamma paasiniaaffigissavaat.

Ilimaginngisaq pulaartoq

Inuusuttut pinngortitaq pillugu Ottawami katersugaasivianut sisamanngormat alakkaagamik nuannersumik tupaallatsinneqarput, Canadap ministeriuneranit Justin Trudeaumit ilimaginngisaminnik pulaarneqaramik.

Ministeriunerup pulaarnermini nammineq inuusuttuaraanermini angalanermi ima ittumi peqataasimanini isumataartinneqarsimaninilu oqaluttuaraa.

- Ilissi issittumi siunissami siuttunngornissarsi tullinnguutissaaq, Canadap ministeriunera Trudeau inuusuttunut oqarpoq, nangillunilu;

- Issittup isumataartillisitoq, ministeriuneq oqarpoq.

Tamannalu eqquutilereersimavoq.

Tallimanngormat ulloq aallarnerneqarpoq Ottawap ilisimatusarfiani sungiusaammik suliaqarluni, assersuutigalugu politikkimik, issittumi ineriartornermik, oqaluttuarisaanermik, piorsarsimassusermik allarpassuarnillu sammisaqarluni.

Illoqarfissuarmi takuniaaneq

Inuusuttut tamassuma kingorna Canadap illoqarfiisa pingaarnersaanni  takornariassallutik eqimattanut marlunnut avipput. 

Inuusuttut misigisalikkersaannerat ilisimasassarsiortitsisut nittartagaani atuarneqarsinnaapput.

- Ottawamiinninni ataatsimoornitsinni kalaallit inooriaasaannut paasisaqarluarpunga, 15-inik ukiulik Kullorsuarmeersoq, Pilunnguaq Karlsen, allappoq.

Kalaaleq inuusuttoq peqataasut ilaat inuulluaqqusilluni aamma allappoq;

- Aluu tamassi! Tamaani ajulaanngilanga, nuanneqaaq immersortinnarlunilu, Linda Kristiansen allappoq. 

Ilisimasassarsiorneq aggustip ulluisa tallimaanni naammassissaaq.